සිරගත වී සිටින හිටපු පාර්ලිමේන්තු මන්ත්‍රී රන්ජන් රාමනායක නිදහස් කර ගැනීම සඳහා කළ හැකි දෙයක් තිබේ දැයි සොයා බලන ලෙස අග්‍රාමාත්‍ය රනිල් වික්‍රමසිංහ සාගල රත්නායක සහ අග්‍රාමාත්‍ය ලේකම් සමන් ඒකනායකට දැනුම් දී තිබේ.
ඒ අනුව සාගල රත්නායක සහ අග්‍රාමාත්‍ය ලේකම්වරයා පසුගිය අඟහරුවාදා වැලිකඩ බන්ධනාගාරයට ගොස් රංජන් රාමනායක හමුවී ඔහුගේ සුවදුක් විමසා බලා තිබෙන බව වාර්තා වෙයි.
තමා මේ දිනවල උපාධියට සූදානම් වන බවත් ඒ වැඩ කටයුතු සඳහා ලබා දී තිබූ ලැප්ටොප් පරිගණකය නැවත බන්ධනාගාර නිලධාරීන් විසින් රැගෙන ගිය බවත් රංජන් රාමනායක එහිදී සාගල රත්නායක හා අග්‍රාමාත්‍ය ලේකම්වරයා සමඟ පවසා තිබේ.
තමා පරිගණකයෙන් ඇමතුම් ගන්නා බව කියමින් එම පරිගණකය රැගෙන ගිය බව රන්ජන් රාමනායක එහිදී ප්‍රකාශ කර තිබේ.
එහිදී අග්‍රාමාත්‍ය ලේකම්වරයා බන්ධනාගාර නිලධාරීන් සමඟ මේ කරුණ සම්බන්ධයෙන් සාකච්ඡා කර ඇති අතර බන්ධනාගාර නිලධාරීන් දැනුම් දී ඇත්තේ අධ්‍යාපන කටයුතු සඳහා අවශ්‍ය සියලු පහසුකම් රංජන් රාමනායක මහතාට ලබාදීමට කටයුතු කරන බවයි.