ලංකා විදුලිබල මණ්ඩලය යෝජනා කළ විදුලි ගාස්තු ඉහළ දැමීමේ යෝජනාවලිය සංශෝධනය කර මහජනතාවගේ දැන ගැනීම සඳහා අද (28) ප්‍රසිද්ධියට පත්කරන බව මහජන උපයෝගිතා කොමිසම පවසයි.
එම යෝජනාවලිය සම්බන්ධයෙන් හෙට සිට සති 03ක කාලයක් මහජනතාවගෙන් අදහස් ලබා ගන්නා බව එහි සභාපති ජනක රත්නායක පැවසීය.
ඊයේ (27) පස්වරුවේ පැවති මාධ්‍ය හමුවකට එක්වෙමින් සභාපතිවරයා මේ බව ප්‍රකාශ කළේය.
විදුලි ඒකක 30, 60, 90 මට්ටමේ මාසික විදුලි පරිභෝජනයක් සිදු කරන පාරිභෝගිකයන්ට සහනයක් ලබාදීමට මහජන උපයෝගිතා කොමිසම සංශෝධන එක් කළ බවද ඔහු සඳහන් කළේය.
බහුතර ගෘහ විදුලි පාරිභෝගිකයින්ට සහනයක් ලෙස ගාස්තු වැඩි කිරීම 57% නොඉක්මවීම බව මහජන උපයෝගිතා කොමිසමේ අදහස බවත් මෙම විදුලි ගාස්තු සංශෝධනයෙන් ඒකක 30ට අඩු බිල්පත් සඳහා සාමාන්‍ය මාසික විදුලි බිල රුපියල් 227 පමණ වන අතර ඒකක 30ට වැඩි නමුත් ඒකක 60ට අඩු අඩු බිල්පත් සඳහා සාමාන්‍ය මාසික විදුලි බිල රුපියල් 658ක් පමණ වන බවත් හෙතෙම අවධාරණය කළේය.
ඒ අනුව ලංකා විදුලිබල මණ්ඩලය විසින් සමස්ත ගෘහස්ථ අංශය සඳහා 138%ක තීරුබදු වැඩිවීමක් යෝජනා කර සිටියත් එය 67% ඉක්මවා නොයා යුතු බව මහජන උපයෝගිතා කොමිසමේ තීරණයයි.
නමුත් ශ්‍රී ලංකා විදුලිබල මණ්ඩලයේ යෝජනාවන්ට අනුව සාමාන්‍ය පාරිභෝගිකයින් සඳහා 45% කින්ද, කාර්මික පාරිභෝගිකයින් සඳහා 61% කින්ද, හෝටල් සඳහා 43% කින්ද, රාජ්‍ය ආයතන සඳහා 43% කින්ද, ආගමික ස්ථාන සඳහා 189% කින් ද විදුලි ගාස්තු වැඩි කිරීමට මහජන උපයෝගිතා කොමිසමෙන් ඉල්ලා තිබේ.