වසර දහයකට වඩා වැඩි කාලයක් කොරියාවේ සේවය කර මෙරටට පැමිණි ශ්‍රමිකයින්ට ඊ 7 වර්ගයේ වීසා ලබාදීම සම්බන්ධයෙන් කොරියානු රජයේ අවධානය යොමු කරන බව කොරියානු තානාපති සන්තෝෂ් වොන්ජිං ජියොං (Santhush Woonjin JEONG) පැවසීය.
විදේශ රැකියා අමාත්‍ය මනුෂ නානායක්කාර හා කොරියානු තානාපති සන්තෝෂ් වොන්ජිං ජියොං (Santhush Woonjin JEONG) අතර හමුවක් ඊයේ (07) උදෑසන පැවති අතර තානාපතිවරයා එහිදී මේ බව ප්‍රකාශ කළේය.
එහිදී දෙරටේ කම්කරු ක්ෂේත්‍රය ගැන වැඩි අවධානයක් යොමු වී ඇති අතර කොරියාවේ පවතින දියුණු තාක්ෂණය ලංකාවේ තරුණ ශ්‍රමිකයින්ට ලබාදීමේ වැදගත්කම මනුෂ නානායක්කාර ඇමැතිවරයා පැහැදිළි කළේය.
ඒ සඳහා තානාපතිවරයාගෙන් සුභවාදී ප්‍රතිචාරයක් හිමි වී තිබේ. ඒ අනුව කොරියාවේ ඉහළ තාක්ෂණයක් ඇති ආයතනවල ඉංජිනේරු සහ තාක්ෂණ ක්ෂේත්‍රයේ ප්‍රවීණයින් ලංකාවට පැමිණ පාසල් හැර ගිය සහ රැකියා අපේක්ෂිත තරුණ තරුණියන් සඳහා පුහුණු වැඩසටහන් ක්‍රියාත්මක කිරීමට අවශ්‍ය පියවර ගන්නා බවට සහතික විය.