ගෝල්ෆේස් පිටියේ පැවති අරගලය හේතුවෙන් එම භූමියට සිදුව ඇති හානිය සඳහා අරගලකරුවන්ගෙන් වන්දි අයකර ගැනීමටත් ඔවුන්ට එරෙහිව නීතිමය පියවර ගැනීමටත් පියවර ගන්නා බවත් නාගරික සංවර්ධන හා නිවාස අමාත්‍ය ප්‍රසන්න රණතුංග පැවසීය.
නාගරික සංවර්ධන අධිකාරියට අයත් මෙම භූමියෙන් අරගලකරුවන්ව ඉවත් කරනු ලැබුවේ රටේ පවතින නීතියට අනුව බවත් කිසිවෙකුට රාජ්‍ය දේපළ බලහත්කාරයෙන් අයිති කරගැනීමට නොහැකි බවත් අමාත්‍යවරයා අවධාරණය කළේය.
අරගල භූමියට අයිතිවාසිකම් ඇති බව පවසමින් අරගලකරුවන් පිරිසක් විසින් නඩු පැවරීමට කටයුතු කර ඇති බවත් ඒ අනුව එම භූමියට සිදුව ඇති හානිය සම්බන්ධයෙන් ඔවුන්ගෙන් වන්දි අයකර ගැනීමට කටයුතු කරන බවත් හෙතෙම සඳහන් කළේය.
එසේ වන්දි අයකර නොගන්නේ නම් පසුකාලීනව අමාත්‍යාංශ නිලධාරීන්ට ගැටලුවලට මුහුණ දීමට සිදුවන බවත් එවැනි අර්බුදයකට තම නිලධාරීන් පත්කිරීමට තමන් කිසිසේත් කටයුතු නොකරන බවත් අමාත්‍යවරයා වැඩිදුරටත් පවසා ඇත.