ලෝක කුසලාන පාපන්දු පිටියේ ප්‍රබල බෙල්ජියම මොරොක්කෝව ඉදිරියේ ඊයේ (27) ලැබූ අමිහිරි පරාජයත් සමඟ කෝපයට පත් බෙල්ජියම් පාපන්දු ලෝලීන් බ්‍රසල්ස් නගරයේ ප්‍රකෝපකාරීව හැසිරී ඇති බව විදෙස් මධ්‍ය වාර්තා කරනවා.
ලෝක ශ්‍රේණිගත කිරීම්වල දෙවන ස්ථානයේ පසුවන ප්‍රබල බෙල්ජියම ලැබූ මෙම පරාජයේ වේදනාව සහ කෝපය ඉවසාගත නොහැකිව බෙල්ජියම් පාපන්දු ලෝලීන් මෙලෙස ප්‍රකෝපකාරී ලෙස හැසිරී ඇති බවයි වාර්තා වන්නේ.
නගරයේ පිහිටි වෙළඳසැල්වලට සහ වාහනවලට හානි සිදුකරමින් මං මාවත්වල ගිනි තබා විශාල විනාශයක් සිදුකරමින් ඔවුන් මෙලෙස ප්‍රචණ්ඩකාරී ලෙස හැසිරී ඇති බව සඳහන්.
මෙලෙස ප්‍රකෝපකාරී ලෙස හැසිරුණු පිරිස් පාලනය කිරීම සඳහා එරට පොලිසියට ජල සහ කඳුළු ගෑස් ප්‍රහාර එල්ල කිරීමට සිදුව ඇති බවයි විදෙස් වාර්තා වැඩිදුරටත් තොරතුරු වාර්තා කළේ.
බ්‍රසල්ස් නගරාධිපති ෆිලිප් ක්ලෝස් පාපන්දු ලෝලීන්ගෙන් නගර මධ්‍යයෙන් ඈත්ව සිටින ලෙස ඉල්ලා සිට ඇති අතර, උමං මාර්ගවල ගමනාගමනය සහ ට්‍රෑම්රථ ගමනාගමනය පවා නවතා දමන්නට මෙම ප්‍රචණ්ඩකාරී තත්ත්වය නිසා සිදුව තිබෙනවා.
මේ අතර ලෝක කුසලානයේ විශාල කැළඹීමක් වූ මොරොක්කෝවේ මෙම ජයග්‍රහණයත් සමඟ බොහෝ බෙල්ජියම් නගරවල මොරොක්කෝ සංක්‍රමණිකන් උද්යෝගයෙන් මෙම ජය සැමරීමට කටයුතු කළ බවට ද තොරතුරු වාර්තා වනවා.
