දරුණුතම ආර්ථික අර්බුදයකට මුහුණ පා තිබෙන ශ්‍රී ලංකාවට සහයෝගය දැක්වීම සඳහා මේ මොහොතේ ඉදිරිපත් නොවන්නේ නම් එය ඉන්දියාව අසල්වැසියෙකු ලෙස සිය වගකීම් පැහැර හැරීමක් බව ඉන්දීය විදේශ කටයුතු අමාත්‍ය එස්. ජයිසංකර් පැවසීය.
හෙතෙම මේ බව සඳහන් කළේ ඊයේ (07) ඉන්දීය පාර්ලිමේන්තුව අමතමිනි.
වත්මන් ඉන්දීය රජය එම වගකීම නිසි ලෙස ඉටු කර ඇති බවත් ඉන්දීයාව ශ්‍රී ලංකාවට එරෙහිව ඡන්ද ප්‍රකාශ කිරීමට නොපැමිණියේ ඉන්දීයාවේ දීර්ඝකාලීන ස්ථාවරයට අනුව බවත් අමාත්‍යවරයා එහිදී සඳහන් කළේය.
එය ඉන්දීය වත්මන් රජය ද අනුගමනය කළ අතර ශ්‍රී ලංකාවේ දෙමළ ප්‍රජාව වෙනුවෙන් ආමන්ත්‍රණය කළ හැකි වඩාත් ඵලදායිම ක්‍රමය එය බව ද ඉන්දීය විදේශ කටයුතු අමාත්‍යවරයා ප්‍රකාශ කර තිබේ.
ශ්‍රී ලංකාවට සහයෝගය ලබාදීමේදී වාර්ගික ප්‍රවේශයක් නොගන්නා අතර ඉන්දීයාව සහයෝගය ලබා දෙන්නේ ශ්‍රී ලංකාවේ වෙසෙන සියලු ජාතීන්ට බව එහිදී ඉන්දීය විදේශ කටයුතු අමාත්‍යවරයා වැඩිදුරටත් ප්‍රකාශ කර ඇත.