බංග්ලාදේශයේ – චිතගොං නුවර කන්ටේනර් පර්යන්තයක සිය මිතුරන් සමඟ හොරා පොලිස් සෙල්ලමේ නිරතවීමට කන්ටේනරයක් තුළ සැඟවුණු දරුවෙක් දින 05කට පසු මැලේසියාවෙන් හමුවූ පුවතක් විදෙස් මාධ්‍ය වාර්තා කරනවා.
15 හැවිරිදි පිරිමි දරුවෙක් මෙලෙස කිලෝමීටර් 3,000කට වඩා දුරින් පිහිටි මැලේසියාවේ කන්ටේනර් පර්යන්තයකින් හමුව ඇති බවයි විදෙස් වාර්තා සඳහන් කරන්නේ. අදාළ දරුවා මිතුරන්ගෙන් සැඟවී සිටීමට කන්ටේනරය තුළ සැඟවුණු අවස්ථාවේ දී එය අගුළුලෑම හේතුවෙන් ඔහු ඒ තුළ සිරව තිබෙනවා.
දරුවා මෙලෙස සැඟවී ඇත්තේ මැලේසියාවට ප්‍රවාහනය කිරීමට නියමිතව තිබූ කන්ටේනර් තොගයකට අයත් කන්ටේනර් පෙට්ටියක් තුළ බවයි වාර්තා වන්නේ.
ඒ අනුව දරුවා සිරව සිටි කන්ටේනරය සහ තවත් කන්ටේනර් තොගයක් රැගෙන භාණ්ඩ ප්‍රවාහන නෞකාව පසුගිය 12 වනදා මැලේසියාවේ ක්ලෑං වරාය බලා ගමන් ආරම්භ කර තිබෙනවා.
දින 05ක දීර්ඝ ගමනකින් පසු නෞකාව මැලේසියාවේ ක්ලෑං වරායට සේන්දු වී ඇත්තේ පසුගිය 16 වනදායි. එහිදී නෞකාවෙන් ගොඩබාන ලද කන්ටේනරය පරීක්ෂා කිරීමේ දී එහි සේවක පිරිසකට කන්ටේනරය තුළ සිරවී සිටි දරුවා හමුවී ඇති බවයි විදෙස් මාධ්‍ය වැඩිදුරටත් තොරතුරු වාර්තා කළේ.
එම අවස්ථාව් දින ගණනක් ජලය සහ ආහාර නොමැතිව කන්ටේනරය තුල සිරව සිටි දරුවා දුර්වල සෞඛ්‍ය තත්ත්වයෙන් පසු වූ බව සඳහන්. කුසගින්න, බිය සහ දැඩි මානසික ව්‍යාකූලත්වයට පත්ව සිටි එම දරුවා විජලනයට ලක්ව සිටි බවත්, වහාම ප්‍රතිකාර සඳහා රෝහල්ගත කිරීමට බලධාරීන් පියවර ගත් බවයි වැඩිදුරටත් තොරතුරු වාර්තා වුණේ.
මැලේසියානු බලධාරීන් පසුව මෙම සිද්ධිය සම්බන්ධයෙන් බංග්ලාදේශයේ විදේශ අමාත්‍යාංශයට දැනුම් දීමට කටයුතු කර තිබෙනවා.