මැලේසියානු රජය අනුමත කළ රැකියා දසදහසේ කෝටාවට අමතරව මෙරට ආරක්ෂක අංශ සාමාජිකයන් සඳහා අතිරේක රැකියා දසදහසක කෝටාවක් වෙන් කර ඇති බව කම්කරු හා විදේශ රැකියා අමාත්‍ය මනුෂ නානායක්කාර පැවසීය.
අමාත්‍යවරයා මේ බව ප්‍රකාශ කළේ ඊයේ (14) කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ පැවති විදේශ රැකියා නියෝජිත ආයතන සඳහා සම්මාන ප්‍රදානය කිරීමේ උළෙලට සහභාගී වෙමිනි.
මෙම රැකියා දසදහස වත්මන් මැලේසියානු රජයේ සහයෙන් රැකියා ලක්ෂය දක්වා වැඩි කරගත හැකි බවත් ඉදිරියේදී මාසිකව ඩොලර් බිලියනයක විදේශ ප්‍රේෂණ ඉලක්කයක් කරා ගමන් කිරීමට සැලසුම් කර ඇති බවත් ඒ සඳහා ජනතාව විදේශ රැකියා වෙත යොමුකිරීමේ සම්පුර්ණ වගකීම රැකියා නියෝජිත ආයතන වෙත පවරා ඇති බවත් අමාත්‍යවරයා පෙන්වා දුන්නේය.