මහා පරිමාණයෙන් අනවසර පතල් කැණීම් කරමින් සිටි පුද්ගලයින් දස දෙනෙකු කුරුවිට පැරඩයිස් වැව ප්‍රදේශයේදී අත්අඩංගුවට ගත් බව පොලිස් විශේෂ කාර්ය බලකාය පවසනවා.
සැකකරුවන් සමඟ පතල් කැනීම් සඳහා යොදා ගන්නා උපකරණ ද පොලිස් බාරයට ගෙන තිබෙනවා.
විශේෂ කාර්ය බලකාය කහවත්ත කඳවුරේ නිලධාරීන්ට ලද තොරතුරකට අනුව විශේෂ කාර්ය බලකාය නිලධාරීන් කණ්ඩායමක් සහ ඇහැළියගොඩ මැණික් හා ස්වර්ණාභාරණ අධිකාරියේ නිලධාරි කණ්ඩායමක් සමඟ ඒකාබද්ධව වැටලීම සිදු කර ඇති බවයි වාර්තා වන්නේ.
එහි දී බලපත්‍ර නොමැතිව ස්වාභාවික පරිසරයට හානි ගෙන දෙමින් පතල් කැණීම් කරමින් සිටි රත්නපුර සහ කුරුවිට ප්‍රදේශවල පදිංචි වයස අවුරුදු 23 සහ 49 වයසේ පසුවන පුද්ගලයන් මෙලෙස අත්අඩංගුවට ගෙන ඇති අතර සැකකරුවන් ඇහැළියගොඩ ජාතික මැණික් හා ස්වර්ණාභරණ අධිකාරිය වෙත භාර දී තිබෙනවා.
