අලුත් අවුරුදු දා බෝතල් කටුවකින් ඇණ සිය පියා ඝාතනය කළ බවට සැකපිට ඔහුගේ පුතා අත්අඩංගුවට ගත් බව කහටරුප්ප පොලිසිය පවසනවා.
මෙහිදී ඝාතනයට ලක්ව ඇත්තේ බදුල්ල, කැන්දගොල්ල, දඹගස්ගොඩ පදිංචිව සිටි 56 හැවිරිදි වියේ පසු වූ අයෙක් බවයි පොලිසිය සඳහන් කළේ.
ඝාතනයට ලක්වූ පුද්ගලයා ඊයේ (14) පස්වරු 7.00ට පමණ බීමතින් පැමිණ බිරිඳට උදැල්ලකින් පහරදීමට උත්සාහ කළ අවස්ථාවේ දී පුතා විසින් එම උදලු පහර වළක්වා බෝතලයක් කඩා පියාට ඇණ ඇති බවයි අනාවරණය වී ඇත්තේ.
එහිදී තුවාල ලැබූ එම පුද්ගලයා බදුල්ල මහ රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා මහනුවර මහ රෝහලට මාරුකර යැවීමට වෛද්‍යවරු කටයුතු කර තිබෙනවා.
අනතුරුව එම පුද්ගලයා එහි ප්‍රතිකාර ලබමින් සිටිය දී මියගොස් ඇති බවයි පොලිසිය වැඩිදුරටත් සඳහන් කළේ.
කහටරුප්ප පොලිසිය මෙම සිද්ධිය සම්බන්ධයෙන් වැඩිදුර විමර්ශන සිදුකරනු ලබනවා.