සුඩාන හමුදා සහ අතුරු හමුදා පැය 72 ක සටන් විරාමයකට එකඟ වී ඇති බව විදෙස් මාධ්‍ය වාර්තා කරයි.
දින 02ක සාකච්ඡාවලින් අනතුරුවයි ඔවුන් මෙම එකඟතාවට පැමිණ ඇත්තේ. සුඩාන හා එරට අතුරු හමුදා අතර ගැටුම්වලින් මේ වනවිට පුද්ගලයින් 427 ක් මිය ගොස් 3,700කට වැඩි පිරිසක් තුවාල ලබා තිබේ.
මේ හේතුවෙන් එරට සිටින විදේශිකයන් ද විශාල වශයෙන් ඉවත්ව යන බවයි විදෙස් මාධ්‍ය වාර්තා කරන්නේ.
මෙම මාසයේ ප්‍රකාශයට පත් කරන ලද තෙවැනි සටන් විරාමය මෙය වන නමුත් ඉන් කිසිදු සටන් විරාමයක් මේ වන තෙක් ක්‍රියාවට නංවා නොමැති අතර හමුදා පාලනයක් යටතේ ඇති සුඩානය පසුගියදා සිවිල් රජයක් යටතට පත් කිරීම පිළිබඳව සළකා බැලීම හේතුවෙන් එරට අතුරු හමුදාවක්, හමුදාවට එරෙහිව සටන් ආරම්භ කළේය.