මධ්‍යම කදුකරයේ බටහිර බෑවුම් ප්‍රදේශයන්ට මෙම දිනවල ඇදහැලෙන අධික වැසි තත්වයන් මත කාසල්රි ජලාශයේ ජල මට්ටමද වේගයෙන් ඉහළ යමින් පවතින බව එම ජලාශය බාර නිලධාරියකු පැවසීය.
මේ පිළිබඳව වැඩිදුරටත් කරුණු දක්වමින් එම නිලධාරියා පැවසුවේ කාසල්රි ජලාශයට ජලය සැපයෙන කෙහෙල්ගමු ඔය ආශ්‍රිත ජල පෝෂක ප්‍රදේශයන්ට පවතින වැසි හේතුවෙන් මෙම තත්වය උද්ගත වී ඇති බවයි.
එම තත්වය මත අද (03) උදෑසන 6.30 වනවිට එම ජලාශයේ ජල මට්ටම අඩි 147යි අඟල් 07ක් පිරි ඇති බවත් එම ජලය ජල විදුලිය නිපදවීම සඳහා විමලසුරේන්ද්‍ර ජල විදුලි බලාගාරය ඇතුළු ජල විදුලි බලාගාර තුනකට මුදා හැරීමට පියවර ගෙන ඇති බවයි ඔහු වැඩිදුරටත් සඳහන් කළේ.