නීති විරෝධී ලෙස විදුලි ආලෝක ධාරා භාවිතයෙන් සහ තහනම් දැල් භාවිතයෙන් ධීවර කටයුතු සිදුකළ පුද්ගලයින් 20 දෙනෙකු සමඟ ඩිංගි යාත්‍රා අටක් සහ නීති විරෝධී ධීවර ආම්පන්න නාවික හමුදා භාරයට ගෙන තිබෙනවා.
නාවික හමුදාව, කෝකිලායි ප්‍රදේශයට ඔබ්බෙන් වූ මුහුදු ප්‍රදේශයේ සහ එම කලපු ප්‍රදේශයේ ඊයේ (05) සිදු කළ විශේෂ සෝදිසි මෙහෙයුමක් මඟිනුයි සැකකරුවන් අත්අඩංගුවට ගැනුණේ.
එහිදී එම මුහුදු ප්‍රදේශයේ නීති විරෝධි ලෙස විදුලි ආලෝක ධාරා භාවිතයෙන් ධීවර කටයුතු සිදුකළ පුද්ගලයින් 4 දෙනෙකු සමඟ ඩිංගි යාත්‍රා 3ක් අත්අඩංගුවට ගැනුණා.
කෝකිලායි කලපු ප්‍රදේශයේ නීති විරෝධී ලෙස විදුලි ආලෝක ධාරා භාවිතයෙන් සහ තහනම් ධීවර දැල් භාවිතයෙන් ධීවර කටයුතු සිදුකළ පුද්ගලයින් 16 දෙනෙකු සමඟ ඩිංගි යාත්‍රා පහක් සහ ධීවර ආම්පන්න ද නාවුක හමුදා භාරයට ගනු ලැබුවා.
මෙම මෙ‍හෙයුම් මඟින් නාවික හමුදා භාරයට ගත් පුද්ගලයින් වයස අවුරුදු 19 ත් හා 59 ත් අතර, වන පුල්මුඩේ, ත්‍රීකුණාමලය, කෝකිලායි, මන්නාරම, මදුරන්කුලිය, රොටවැව, මීගමුව, කටුනේරිය, සහ මාතර යන ප්‍රදේශයන්හී පදිංචිකරුවන් බවටයි හඳුනාගෙන ඇත්තේ.
එම පුද්ගලයින්, ඩිංගි යාත්‍රා සහ නීති විරෝධී ධීවර ආම්පන්න ඉදිරි නීතීමය කටයුතු සඳහා කුච්චවේලී ධීවර පරීක්‍ෂක කාර්යාලය වෙත භාර දී තිබෙනවා.