මීළඟ ගෝලීය වසංගත තත්ත්වයට සූදානම් විය යුතු බවට ලෝක සෞඛ්‍ය සංවිධානය අනතුරු අඟවා තිබේ.
එය කොවිඩ් – 19 වසංගත තත්ත්වයට වඩා මාරාන්තික විය හැකි බවයි එහි ප්‍රධානී ටෙඩ්රෝස් ගේබ්‍රියේසස් සඳහන් කළේ.
76 වන ලෝක සෞඛ්‍ය සමුළුව වෙත සිය වාර්තාව ඉදිරිපත් කරමින් ලෝක සෞඛ්‍ය සංවිධානයේ ප්‍රධානීවරයා මේ බව පැවසීය.
කොවිඩ් -19 සම්බන්ධයෙන් වූ ගෝලීය හදිසි අවස්ථාව මේ වන විට අවසන් වී තිබුණ ද කොවිඩ් හේතුවෙන් පවතින ගෝලීය සෞඛ්‍ය තර්ජනය මෙතෙක් අවසන් වී නොමැති බවයි ඔහු අවධාරණය කළේ.
මේ වන විට වෙනත් ප්‍රභේදයක තර්ජන මතුවෙමින් පවතින බවත් එය නව රෝගීන් හා මරණ වාර්තාවීම ඉහළ යාමට හේතුවනු ඇති බවත් ඔහු එහිදී ප්‍රකාශ කළේය.