දිවයිනට පැමිණ සිටින මාලදිවයිනේ විදේශ කටයුතු අමාත්‍ය අබ්දුල්ලා ෂාහිඩ් අග්‍රාමාත්‍ය දිනේෂ් ගුණවර්ධන හමුවී තිබේ.
අද (08) අරලියගහ මන්දිරයේදී මෙම හමුව සිදුව ඇති අතර මේ වන විට දෙරට අතර පවතින සහයෝගීතා ක්ෂේත්‍ර ශක්තිමත් කිරීම සහ වෙළෙඳාම, ආයෝජනය, අධ්‍යාපන සහ සංස්කෘතික ක්ෂේත්‍රවල නව සහයෝගීතා මාර්ග ගවේෂණය කිරීම පිළිබඳව එහිදී අදහස් හුවමාරු කරගෙන ඇති බවයි වාර්තා වන්නේ.
මාලදිවයිනේ සිසුන්ට ගාස්තු අය කිරීමේ පදනම මත වෛද්‍ය අධ්‍යයන සහ පශ්චාත් උපාධි අධ්‍යයන ක්ෂේත්‍රවල අධ්‍යාපන අවස්ථා සඳහා පහසුකම් සලසා දෙන්නැයි මාලදිවයින් විදේශ කටයුතු අමාත්‍යවරයා අග්‍රාමාත්‍ය දිනේෂ් ගුණවර්ධනගෙන් ඉල්ලීමක්ද කළේය.
සංචාරක හා බලශක්ති ක්ෂේත්‍රයේ විශේෂයෙන් සූර්ය බලශක්ති සහ සුළං බලශක්ති ක්ෂේත්‍රයේ සහයෝගීතාව වර්ධනය කර ගැනීමේ අවශ්‍යතාව ද අග්‍රාමාත්‍යවරයා මෙහිදී පෙන්වා දී තිබේ.