කුලි ගමන් යන මුවාවෙන් ත්‍රිරෝද රථ රියදුරන් රැගෙනවිත් තියුණු ආයුධ පෙන්වා මරණීය තර්ජනය කර පහර දී ඔවුන් සතු දේපළ සහ ත්‍රිරෝද රථ කොල්ල කෑ සංවිධානාත්මක කල්ලියක දෙදෙනෙක් අත්අඩංගුවට ගෙන තිබෙනවා.
සැකකරුවන් සන්තකයේ තිබී කඩුවක්, මන්නයක් සහ උල් පිහියක් පොලිස් භාරයට ගෙන ඇති අතර මීට දින කීපයකට ඉහතදී පානදුර නගරයේ සිට කුලී ගමනක් යන මුවාවෙන් ත්‍රිරෝද රථයට ගොඩ වූ පුද්ගලයන් සිවුදෙනෙකු අලුබෝමුල්ල පමුණුගම තොටුපොළ අසළ කැලෑබද ප්‍රදේශයට රැගෙනවිත් තියුණු ආයුධ පෙන්වා, මරණීය තර්ජනය කර බිය ගන්වා පහර දී ඔවුන් සතු ජංගම දුරකථන මුදල් පසුම්බි මෙන්ම ත්‍රිරෝද රථ දෙකක් කොල්ලකෑම සම්බන්ධයෙන් පැය දෙකක් පමණ කාලයක් තුළදී ලද පැමිණිලි සම්බන්ධයෙන් සිදුකළ විමර්ශනවලදී සැකකරුවන් අත්අඩංගුවට අත් අඩංගුවට ගැනීමට හැකි වූ බව පොලිසිය පවසයි.
අත්අඩංගුවට ගත් සැකකරුවන් පානදුර, වෑකඩ ප්‍රදේශයේ පදිංචි පුද්ගලයන් දෙදෙනෙකි. එම සැකකරුවන් දෙදෙනාගෙන් ප්‍රශ්න කිරීමේදී කොල්ල කන ලද ත්‍රිරෝද රථ දෙක හා තියුණු ආයුධ එක් සැකකරුවකුගේ නිවස පිටුපස සඟවා තිබියදී සොයා ගෙන ඇත.
සංවිධානාත්මක කල්ලියට සම්බන්ධ තවත් පුද්ගලයන් දෙදෙනෙක් සැකකරුවන්ගෙන් ප්‍රශ්න කිරීමේදී ලද තොරතුරු මත හඳුනාගෙන ඇති අතර ඔවුන් මේ වනවිට ප්‍රදේශයෙන් පළාගොස් ඇති බව පොලිසිය පවසයි.
සැකකරුවන් තදින් මත්ද්‍රව්‍යවලට ඇබ්බැහි වූවන් බව අනාවරණය වී ඇති අතර සැකකරුවන් පානදුර මහේස්ත්‍රාත් අධිකරණයට ඉදිරිපත් කිරීමට නියමිතය.
අලුබෝමුල්ල පොලිසිය පරීක්ෂණ පවත්වනු ලබයි.