මීහරක් රංචුවක් පැන්නීම නිසා තුවාල ලැබූ දරුවන් 05 දෙනෙක් හල්දුම්මුල්ල දිසා රෝහලට ඇතුළත් කළ බව පොලිසිය පවසයි.
පොලීසිය පැවසුවේ හල්දුම්මුල්ල, බත්ගොඩදී අද (11) අලුයම පාසල් එමින් සිටි දරුවන් පිරිසකට මෙලෙස මීහරක් රංචුවක් ඇන ඇති බවයි.
හල්දුම්මුල්ල කොට්ඨාස අධ්‍යාපන කාර්යාලයට අයත් බත්ගොඩ විපුලානන්ද දෙමළ මහ විදුහලට එමින් සිටි සිසුන් පස් දෙනෙකුටයි මෙම අකරතැබ්බය සිදු වී ඇත්තේ.
පොලීසිය පැවසුවේ බත්ගොඩ මංසන්ධියේ සිට විදුහලට පාගමනින් එමින් සිටියදී පුද්ගලයෙකු විසින් දක්කාගෙන ආ මීහරක් කුලප්පු වී දරුවන් පසුපස පන්නා ඇති බවයි.
තුවාල ලැබූ දරුවන් ගේ තත්වය එතරම් බරපතල නොවන බව රෝහල් ආරංචිමාර්ග සඳහන් කරයි.