පුත්තලම නගරයේ නිවසකට ඊයේ (15) දිනයේ පැමිණි නාඳුනන පුද්ගලයින් දෙදෙනෙකු විසින් ලබා දුන් කේක් සහ බීම වර්ගයක් ආහාරයට ගැනීමෙන් පසු එකම පවුලක පස්දෙනෙකු හදිසියේ රෝගාතුර වූ පුවතක් වාර්තා වනවා.
මෙලෙස රෝගාතුර වූ පස්දෙනා ප්‍රතිකාර සඳහා පුත්තලම මූලික රෝහලට ඇතුළත් කර ඇති බවයි පොලිසිය සඳහන් කළේ.
හදිසියේ ඇති වූ රෝගී තත්ත්වයෙන් මෙලෙස රෝහල් ගතකර ඇත්තේ වයස අවුරුදු 86, 84, 65, 63 සහ 29 හැවිරිදි වියේ පසුවන්නන් පිරිසක්.
නාඳුනන පුද්ගලයින් දෙදෙනෙක් ඊයේ (15) දිනයේ අදාළ නිවසට පැමිණ ඇත්තේ මේ වනවිට හෘද සැත්කමකට ලක්කර සිටින මෙම නිවසේ හිමිකරුව හඳුනන බවට දන්වමින්.
එලෙස පැමිණි ඔවුන් පුද්ලික ආයතනයකින් ලබාදෙන රුපියල් පනස් දහසක මුදලක් ප්‍රධානය කිරීමට කටයුතු කරන බවයි පවසා ඇත්තේ.
ඒ, අනුව අදාළ රුපියල් පනස්දහසක චෙක්පත ලබාදීමට පෙර ඔවුන් පවසා ඇත්තේ, තමන් දෙදෙනා ගෙන ආ කේක් සහ පැණි බීම ආහාරයට ගෙන චෙක්පත ප්‍රධානය කිරීමට සූදානම් වන ආකාරය ඡායාරූප ගතකර අදාළ ආයතනය වෙත යැවිය යුතු බවයි.
ඊට එකඟ වූ නිවැසියන් විසින් මෙම ආගන්තුකයින් දෙදෙනා ගෙන ආ කේක් කපා ආහාරයට ගෙන පැණි බීම ද පානය කර තිබෙනවා.
එහිදී එම ආහාර ලබාගත් නිවැසියන් සිව්දෙනෙක් ටික වේලාවකට පෙර සිහිසුන්ව ඇද වැටී ඇති අතර, රෝගීව සිටි නිවැසියා තම දියණියකට දුරකථනයෙන් ඇමතුමක් දී පවසා ඇත්තේ මව ඇතුළු පවුලේ සියලු දෙනා සිහිසුවන් බිම ඇදවැටුණු බවයි.
එම අවස්ථාවේ කලබලයට පත් නිවසට පැමිණ සිටි ආගන්තුකයින් දෙදෙනා පළාගොස් ඇති බවයි වාර්තා වන්නේ.
දුරකථන ඇමතුම ලබාගත් දියණිය වහාම නිවසට පැමිණ සිහිසුන්ව ඇද වැටී සිටි පවුලේ අයව අසල්වැසියන්ගේ ආධාරයෙන් පුත්තලම රෝහලට රැගෙන යාමට කටයුතු කර තිබෙනවා.
මෙම සිද්ධිය සම්බන්ධයෙන් පරීක්ෂණ සිදුකරන පොලිසිය පවසන්නේ නිවස කොල්ල කෑමට හෝ වෙනත් අරමුණකින් අදාළ පුද්ගලයින් දෙදෙනා පැමිණ ඇති බවයි.
සැකකරුන් අත්අඩංගුවට ගැනීමට පරීක්ෂණ මේ වනවිටත් ක්‍රියාත්මක බවයි පොලිසිය පැවසුවේ.