මෙවර මහනුවර ඓතිහාසික ඇසළ පෙරහර මංගල්‍යය වෙනුවෙන් රුපියල් එක් කෝටි තිස් දෙලක්ෂ අනු නවදහස් දහයක මුදලක් විදුලි ආලෝකය සඳහා වැයවන බව ලංකා විදුලිබල මණ්ඩලය විසින් දියවඩන නිළමේවරයා වෙත දැනුම් දී තිබෙනවා.
අගෝස්තු මස 21 සිට 31 දින දක්වා මෙවර ඇසළ පෙරහර මංගල්‍යය පැවැත්වීමට නියමිත අතර, විදුලි ආලෝකකරණ කටයුතු සඳහා වැයවන ඇස්තමේන්තු ගත මුදල කලින් දක්වා තිබීම විශේෂත්වයක්.
විදුලිබල මණ්ඩලයේ ප්‍රධාන ඉංජිනේරු (මහනුවර නගරය) ඒ.එච්.එම්.එස්.එච්. අබේරත්නගේ අත්සනින් යුතුව අදාළ ලිපිය ශ්‍රී දළදා මාළිගාවේ දියවඩන නිළමේවරයා සහ සතර මහා දේවාලවල බස්නායක නිලමේවරුන් වෙත යොමු කර තිබෙනවා.
ඒ, අනුව ඇස්තමේන්තුගත එම මුදල් ‘සාමාන්‍යඅධිකාරි විදුලිබල මණ්ඩලය’ නමින් ලියන ලද චෙක්පතක් මඟින් ගෙවන ලෙසට ද එම ලිපි මඟින් දන්වා තිබීම ද විශේෂත්වයක්.
