2023 වසරේදී ඊශ්‍රායලයේ සාත්තු සේවක රැකියා සඳහා යැවූ ශ්‍රමිකයන් සංඛ්‍යාව 200 ඉක්මවා ඇති බව කම්කරු හා විදේශ රැකියා අමාත්‍යාංශය පවසයි.
ඒ අනුව මේ වසරේ මුල් මාස 06 තුළදී පමණක් ශ්‍රී ලාංකිකයන් 202කට ඊශ්‍රායලයේ සාත්තු සේවා රැකියා වරම් හිමිව ඇති අතර ඊශ්‍රායල රජය හා ශ්‍රී ලංකා රජය අතර ඇති කරගන්නා ලද අවබෝධතා ගිවිසුම අනුව ශ්‍රී ලංකා විදේශ සේවා නියුක්ති කාර්යාංශය මගින් පමණක් ඊශ්‍රායලයේ සාත්තු සේවා රැකියා ශ්‍රී ලාංකිකයන්ට හිමි වේ.
පෙරේදා (31) කම්කරු හා විදේශ රැකියා අමාත්‍යාංශයේදී ඊශ්‍රායලයේ සාත්තු සේවා රැකියා වරම් ලැබූ තවත් ශ්‍රී ලාංකිකයන් 15 දෙනෙකු සඳහා ගුවන් ටිකට්පත් ප්‍රදානය කිරීම කම්කරු හා විදේශ රැකියා ඇමැති මනුෂ නානායක්කාරගේ ප්‍රධානත්වයෙන් සිදුකෙරිණි.
එහිදී අමාත්‍යවරයා කියා සිටියේ ඊශ්‍රායලයේ රැකියා ලබාගැනීම සඳහා කිසිදු බාහිර පුද්ගලයෙකුට මුදල් හෝ ගමන් බලපත්‍රය ලබාදීමෙන් වළකින ලෙසයි.
මෙම කණ්ඩායම ඊශ්‍රායලයේ රැකියා හිමිවූ 69 වන ශ්‍රමික කණ්ඩායම වන අතර එම පිරිස ලබන මස 02 වැනිදා ඊශ්‍රායලය බලා පිටත්ව යාමට නියමිතය.