මාස ගණනක සිට ඔස්ට්‍රේලියාවේ සිර වී සිටින ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක හට ඕස්ට්‍රේලියාව තුළ සංචාරය කිරීමට සිඩ්නි අධිකරණය ඇප කොන්දේසි ලිහිල් කරමින් අවසර ලබා දී තිබේ.
විදෙස් මාධ්‍ය වාර්තා කර ඇත්තේ ඒ අනුව මෙම මස තුළදී ඕස්ට්‍රේලියාව තුළ දෙවතාවක් සංචාරය කිරීමට ධනුෂ්ක ගුණතිලක හට සිඩ්නි ඩවුනින්ග් සෙන්ටර් අධිකරණය අවසර ලබා දී ඇති බවයි.
මෙම සතියේ දින හතරක් සහ මස අවසානයේ දින හතරක් ගුවන්තොටුපොළවල් වෙත යෑමට ගුණතිලකට අවසර ලබා දී ඇති අතර ජාත්‍යන්තර ගුවන්තොටුපොළවල් වෙත යෑම වළක්වාලමිනුයි පනවා තිබූ දැඩි ඇප කොන්දේසිය ලිහිල් කරමින් මෙම අවසරය ලබා දී ඇත්තේ.
නමුත් සිඩ්නි ඩවුනින්ග් සෙන්ටර් අධිකරණය ධනුෂ්කට නියෝග කර ඇත්තේ සංචාරය කිරීමට අවම වශයෙන් පැය 48 කට පෙර සංචාරයේ කාලසීමාව, ස්ථානය සහ ගමන් මාර්ගය පොලිසියට දැනුම් දිය යුතු බවයි.