වැලිවේරිය – ජුබිලි මාවතේදී මෝටර් රථයකින් ගමන් කරමින් සිටි මාදෙල්ගමුවේ ‘වේග බට්ටා’ යන අන්වර්ථ නාමයෙන් හඳුන්වන අපරාධ කල්ලි සාමාජිකයාට වෙඩි තැබීමේ සිද්ධිය සම්බන්ධයෙන් මීගමුවේ සංගීත කණ්ඩායමක නිත්‍ය ගායකයෙකු අත්අඩංගුවට ගෙන තිබෙනවා.
ගම්පහ කොට්ඨාස අපරාධ විමර්ශන කාර්යාංශයේ නිලධාරීන් විසින් මෙම සැකකරු අත්අඩංගුවට ගෙන ඇති අතර, ඔහු ඊයේ (03) ගම්පහ වැඩබලන මහේස්ත්‍රාත්වරයා හමුවට ඉදිරිපත් කිරීමෙන් පසුව රඳවාගෙන ප්‍රශ්න කිරීමට පොලිසියට අවසර ලබා දී තිබුණා.
මෙම සැකකරු විසින් වෙඩික්කරුවන්ට අපරාධය සිදුකිරීම සඳහා යතුරුපැදිය ලබාදී ඔවුන්ට ආධාර අනුබල ලබාදී ඇති බවටයි අනාවරණය කරගෙන ඇත්තේ.
සැකකරු මීගමුව – සමෘද්ධිගම ප්‍රදේශයේ පදිංචි 31 හැවිරිදි පුද්ගලයෙක් වන අතර ඔහුගේ ජංගම දුරකථනය ද පොලිස් නිලධාරීන් භාරයට ගෙන එහි දත්ත ඔස්සේ විමර්ශනයක් ආරම්භ කර ඇති බවයි වාර්තා වුණේ.
මෙම සැකකරු දැනට විදේශයක සැඟව සිටින ‘කිරි පුතා’ යන අන්වර්ථ නාමයෙන් හඳුන්වන සංවිධානාත්මක අපරාධකරුගේ සමීපතම ගෝලයකු වනවා.
මෝටර් රථයකින් ගමන් කරමින් සිටි නුවන් රන්ජන් හෙවත් ‘වේග බට්ටා’ යන අන්වර්ථ නාමයෙන් හඳුන්වන අපරාධ කල්ලි සාමාජිකයාට පසුගිය අගෝස්තු මස 05 වනදා මෙම වෙඩි තැබීම සිදුකර තිබුණා.
පස් කැපීමේ සිද්ධියක් මුල් කරගෙන ගම්පහ, කෙහෙල්බද්දර ප්‍රදේශයේ පාතාල කල්ලි දෙකක් අතර කලක සිට පවතින ආරවුලක් මෙම වෙඩි තැබීමට හේතු වී ඇති බවයි පොලීසිය පැවසුවේ.