තමා විසින් සිය බිරිඳව ඝාතනය කළ බවට පාපොච්චාරණය කළ ශ්‍රී ලාංකිකයෙක්ට එරෙහිව සිංගප්පුරු පොලීසිය විසින් අද (11) චෝදනා ගොනු කර තිබේ.
විදෙස් මාධ්‍ය වාර්තා කරන්නේ 30 හැවිරිදි එශාන් තාරක කෝට්ටගේ නමැති පුද්ගලයා කැටොන්ග් නම් ප්‍රදේශයේ පිහිටි හෝටලයක් තුළදී සිය බිරිඳව ඝාතනය කර ඇති බවයි.
මෙලෙස ජීවිතක්ෂයට පත්ව ඇත්තේ 32 හැවිරිදි වියේ පසුවන සෙව්වන්දි මදුකා කුමාරි නැමැති කාන්තාවකි.
පසුගියදා (09) උදෑසන 10.45ත් සවස 4.42ත් අතර මෙම ඝාතනය සිදුකර ඇති අතර ඝාතනය සිදු කිරීමෙන් අනතුරුව සැකකරු පොලීසියට භාරවී තිබේ.
පොලිසිය හෝටල් කාමරයට පැමිණෙන විටත් ඇය කැපුම් තුවාලයක් සහිතව කාමරය තුළ වැටී ඇති අතර සිද්ධියට යොදා ගත් බවට සැක කෙරෙන පිහියක්ද හෝටල් කාමරයක තිබී සොයා ගෙන ඇති බවයි විදෙස් මාධ්‍ය වාර්තා කරන්නේ.
මේ වනවිට සැකකරු අධිකරණයට ඉදිරිපත්කර ඇති අතර එහිදී ඔහුව සතියක් බන්ධනාගාරගත කිරීමට නියෝග කර තිබේ.