හෙරොයින් මත්ද්‍රව්‍ය ග්‍රෑම් 06 කට ආසන්න ප්‍රමාණයක් සන්තකයේ තබාගැනීම සහ ජාවාරම් කිරීමේ චෝදනාවලට වරදකරු කෙරුණු පුද්ගලයෙකුට කොළඹ මහාධිකරණය විසින් ජීවිතාන්තය දක්වා සිර දඬුවම් නියම කර තිබෙනවා.
කොළඹ මහාධිකරණ විනිසුරු ආදිත්‍ය පටබැඳිගේ විසින් සුදත් ප්‍රසන්න නමැති විත්තිකරුවෙකුටයි මෙලෙස ජීවිතාන්තය දක්වා සිර දඬුවම් නියම කෙරුණේ.
2018 වසරේ ග්‍රෑන්ඩ්පාස්, ඛෙත්තාරාම ප්‍රදේශයේ සිදුකළ වැටලීමකදී හෙරොයින් ග්‍රෑම් 5.9 ක් සමග පොලීසිය විසින් මෙම විත්තිකරු අත්අඩංගුවට ගෙන තිබුණා.
පසුව මොහුට එරෙහිව නීතිපතිවරයා විසින් කොළඹ මහාධිකරණය හමුවේ නඩු පවරනු ලැබූ අතර එම දීර්ඝ නඩු විභාගයෙන් අනතුරුව තීන්දුව ප්‍රකාශයට පත් කළ විනිසුරුවරයා සඳහන් කළේ මෙම විත්තිකරුට එරෙහිව පැමිණිල්ල විසින් එල්ල කර තිබූ චෝදනා සාධාරණ සැකයකින් තොරව ඔප්පු වී ඇති බවයි.
ඒ අනුව ඔහුට ජීවිතාන්තය දක්වා සිර දඩුවම් නියම කරන ලෙසයි විනිසුරුවරයා නියෝග කළේ.