මස්කෙළිය, මාවුස්සාකැලේ ජලාශයට ඉහළින් පිහිටි රිකාටන් රක්ෂිතයේ ගින්නක් හටගෙන තිබෙනවා.
අප වාර්තාකරු පැවසුවේ කිසියම් පිරිසක් විසින් ඊයේ (18) රාත්‍රියේ රිකාටන් කඳුවැටියට ඉහළින් පිහිටි වන වගා රක්ෂියට ගිනි තබා ඇති බවයි.
මාවුස්සාකැලේ ජල පෝෂක ප්‍රදේශවල මේ දිනවල පවතින අධික වියළි කාලගුණය සහ දැඩි සුළං තත්ත්වය හේතුවෙන් ගින්න සීඝ්‍රයෙන් පැතිර යමින් පවතී.
ගින්න හටගෙන ඇති රක්ෂිතය තුළ ගෝනුන්, මුවන්, කදුකර කොටියන්, ඌරන් ඇතුළු වන සතුන් ගණනාවක් වෙසෙන රක්ෂිතයක් වන අතර එම සතුන් දඩයම් කිරීමේ අරමුණින් කිසියම් පිරිසක් රක්ෂිතයට ගිනි තබන්නට ඇති බවයි පොලීසිය සැක පළ කරන්නේ.
ගින්න හේතුවෙන් මේ වන විට මාවුස්සාකැලේ ජල පෝෂක ප්‍රදේශය පුරා දැඩි දුමාරයක් පවතී.