නවසීලන්තය සිය රටේ රැකියා වීසා (work visa) වැඩසටහනේ ක්ෂණික වෙනස්කම් නිවේදනය කර ඇත.
ඊයේ (07) ප්‍රකාශයට පත් කරන ලද නිවේදනයක දැක්වෙන්නේ 2023 දී නවසීලන්තයට ‘තිරසාර නොවන’ සංක්‍රමණවල වැඩිවීමක් පෙන්නුම් කරන බවයි.
ඒ අනුව නවසීලන්ත රැකියා වීසා වැඩසටහනේ වෙනස්කම් අතරට අඩු නිපුණතා සහිත රැකියා සඳහා ඉංග්‍රීසි භාෂා අවශ්‍යතාවයක් හඳුන්වාදීම සහ බොහෝ සේවා යෝජකයන්ගේ රැකියා වීසා සඳහා අවම කුසලතා සහ සේවා පළපුරුද්ද සීමාවන් සැකසීම ඇතුළත් වේ.
එසේම අඩු නිපුණතා සහිත රැකියා සඳහා උපරිම අඛණ්ඩ රැඳී සිටීම වසර 5 සිට වසර 3 දක්වා අඩු කෙරේ.
පසුගිය වසරේ 173,000ක් පමණ නවසීලන්තයට සංක්‍රමණය වී ඇති අතර ඕස්ට්‍රේලියාව සඳහා ද සංක්‍රමණවල විශාල වර්ධනයක් පෙන්නුම් කරන බවයි විදෙස් මාධ්‍ය වාර්තා කරන්නේ.