ඊයේ (28) යාපනය ශික්ෂණ රෝහල තුළට යතුරුපැදියකින් ඇතුළු වී රෝහල් කාර්ය මණ්ඩලයට පහරදීමේ සිද්ධියට අදාළව අත්අඩංගුවට ගත් දෙදෙනා ජුනි 11 වැනිදා දක්වා රක්ෂිත බන්ධනාගාරගත කර තිබෙනවා.
කැපුම් තුවාල සහිත පුද්ගලයෙක් යාපනය ශික්ෂණ රෝහල තුළටම යතුරුපැදියකින් තවත් තරුණයෙකු ඇතුළත් කිරීම හේතුවෙන් ඊයේ එහි නොසන්සුන්තාවක් හට ගත්තා.
රෝහල තුළට ඇතුළු වූ යතුරුපැදිය පැදවූ පුද්ගලයා බීමතින් සිට ඇති අතර ඔහු රෝහල් කාර්ය මණ්ඩලයට බල කරමින් රෝහලේ නොසන්සුන් අයුරින් හැසිරුණු අයුරු රෝහලේ පිහිටි සී සී ටී වී කැමරාවල සටහන්ව තිබෙනවා.
එහිදී රෝහල් කාර්ය මණ්ඩලය විසින් යතුරුපැදිය පැදවූ පුද්ගලයාට යතුරුපැදියෙන් රෝහල තුළට පැමිණියේ ඇයි දැයි විමසූ විට යතුරුපැදිකරු විසින් රෝහල්කාර්ය මණ්ඩලයේ සේවකයෙකුට අසළ තිබූ මුද්‍රණ යන්ත්‍රයකින් පහරදීමක් සිදුකොට තිබේ.
එම පහරදීමෙන් රෝහල් කාර්ය මණ්ඩල සේවකයාද තුවාල ලබා ඇති අතර රෝහල් කාර්යය මණ්ඩලය විසින් මෙම පහරදීම සිදු කළ පුද්ගලයා අල්ලා යාපනය පොලිසියට භාර දී තිබෙනවා.
පසුව පහරදීම සිදුකරන ලද පුද්ගලයා සහ යතුරුපැදියේ තුවාල සහිතව පැමිණි පුද්ගලයාද යාපනය පොලීසිය විසින් අත්අඩංගුවට ගෙන ඊයේ (28) යාපනය අධිකරණය වෙත ඉදිරිපත් කර තිබෙනවා.
පොලිසිය විසින් සිදු කරන ලද පරීක්ෂණවලදී අනාවරණය වී ඇත්තේ අදාළ තරුණයන් විසින් කිසියම් සාදයක් පවත්වා ඇති අතර එහිදී සිදු වූ බහින්බස්වීමක් දුරදිග යාමෙන් ඇති වූ ගැටුමකදී සිදුකළ පහරදීමක් හේතුවෙන් එක් අයෙකුගේ අතට සිදුවූ කැපුම් තුවාල හේතුවෙන් එම පුද්ගලයා ප්‍රතිකාර සඳහා යාපනය ශික්ෂණ රෝහලට බීමතින්ම යතුරුපැදියකින් රැගෙන විත් ඇති බවයි.