සැප්තැම්බරයේදී පැවැත්වීමට නියමිත ජනාධිපතිවරණයට තරග කරන අපේක්ෂකයා වෙනම අපේක්ෂකයෙකු ලෙස ඉදිරිපත් කිරීමට ශ්‍රී ලංකා පොදුජන පෙරමුණ තීරණය කර තිබෙනවා.
පොදුජන පෙරමුණේ දේශපාලන මණ්ඩලය ඊයේ (29) රැස් වූ අතර එහිදීයි මෙම තීරණය ගෙන ඇත්තේ.
ඊයේ පස්වරුවේ විජේරාමේ පිහිටි හිටපු ජනාධිපති මහින්ද රාජපක්ෂගේ නිල නිවසට පොහොට්ටුවේ දේශපාලන මණ්ඩල සභිකයින් රැස් වුණා.
රැස්වීමෙන් පසු මාධ්‍ය වෙත අදහස් දක්වමින් පොදුජන පෙරමුණේ මහලේකම් සාගර කාරියවසම් කියා සිටියේ පොහොට්ටුවෙන් ඉදිරිපත් කරන අපේක්ෂකයා කවුරුන් දැයි අද දිනයේදී තීරණය නොකළ බවයි.
කෙසේනමුත් පොහොට්ටුවට ජයග්‍රහණය කළ හැකි අපේක්ෂකයෙකු ඉදිරිපත් කිරීමට ඒකමතිකව තීරණය කෙරුණු බවයි මහලේකම්වරයා සඳහන් කළේ.
මෙම තීන්දුවත් සමඟ එළඹෙන ජනාධිපතිවරණයේදී පොහොට්ටුවේ සහාය කිසිදු ලෙසකින් වත්මන් ජනපති රනිල් වික්‍රමසිංහ හට හිමි නොවනු ඇති.