කටුනායකින් ඇරඹූ සුඛෝපභෝගී බස් සේවයටත් තිත

පසුගියදා කටුනායක ගුවන්තොටුපොළේ සිට ගමන් ආරම්භ කළ සුඛෝපභෝගී බස් රථ සේවාව (AirPort Terminal Shuttle Service) තාවකාලිකව නවතා දමා තිබෙනවා.

මෙම නව බස් රථ සේවාව පසුගිය 15 වැනිදා කටුනායක ගුවන් තොටුපොළේ සිට කොළඹ, කොටුව දුම්රිය ස්ථානය වෙත සහ මාකුඹුර බහුවිධ ප්‍රවාහන මධ්‍යස්ථානය වෙත ගමන් ආරම්භ කළා.

කෙසේනමුත් මෙම නව බස් රථ සේවාව ආරම්භ කළ සැනින් ඊට එරෙහිව ගුවන් තොටුපොළ – කොටුව පෞද්ගලික සුඛෝපභෝගී බස් රථ සංගමය විරෝධතා ඉදිරිපත් කරමින් බස් රථ වර්ජනයක් ද ආරම්භ කර තිබුණා.

ඊට අමතරව ඔවුන් ප්‍රවාහන සහ මහාමාර්ග අමාත්‍යාංශය, මැතිවරණ කොමසාරිස් කාර්යාලය වෙත ගොස් සිය විරෝධතා ඉදිරිපත් කරනු ලැබුවා.

මෙම විරෝධතා ව්‍යාපාරයට කටුනායක ගුවන් තොටුපොළ කුළී රථ ධාවන සංගම් ද සහයෝගය පළ කර තිබූ අතර මේ සියල්ල සලකා බලා මෙම බස් රථ සේවය තාවකාලිකව නවතා දැමීමටයි පියවර ගෙන ඇත්තේ.