දිවයිනේ සියලු ප්‍රදේශවලින් වැඩම කළ මහා නායක හිමිවරු ජනාධිපති රනිල් වික්‍රමසිංහට ආශිර්වාද පළ කර තිබෙනවා.
අර්බුදයකින් ජාතියක් එතෙර කළ හැක්කේ අත්දැකීම් ඇති නායකයෙක්ට පමණක් බවත් රට අර්බුදයට පත් වූ අවස්ථාවේ නිර්භීතව රටේ වගකීම භාරගත් ජනපති ජනතාව පීඩාවෙන් මුදවා ගත් බවත් මල්වතු අනුනායක අතිපූජ්‍ය නියංගොඩ විජිතසිරි හිමිපාණන් වහන්සේ පැවසූහ.
එබැවින් ජනාධිපති රනිල් වික්‍රමසිංහගේ වැඩපිළිවෙළ පිළිබඳ මහා
සංඝරත්නය තුළත්, මහජනතාව තුළත් මනා පැහැදීමක් ඇති බව පෙන්වා දුන් මල්වතු අනුනායක හිමියන් පසුගිය දෙවසර තුළ රටේ ආර්ථිකය ගොඩනැගීමට ජනාධිපතිවරයා සිදු කළ කාර්යභාරය සහ රට ගොඩනගන එතුමාගේ ඉදිරි දැක්ම පිළිබඳ ගිහි පැවිදි සියලුදෙනා අවබෝධයෙන් යුතුව අවධානය යොමු කළ යුතු බවද පැවසූහ.
උන්වහන්සේ මේ බව ප්‍රකාශ කළේ ජනාධිපතිවරණ ජයග්‍රහණය වෙනුවෙන් ජනාධිපති රනිල් වික්‍රමසිංහට ආශිර්වාද පළ කරමින් ජනාධිපති නිල නිවසේ පැවති සෙත් පිරිත් සජ්ජායනාව ආරම්භ කිරීමට මත්තෙන් විශේෂ අනුශාසනාවක් සිදු කරමිනි.
ඓතිහසික මහනුවර දළදා මාළිගාව ප්‍රමුඛ මල්වතු අස්ගිරි මහා විහාර නියෝජනය කරමින් සහ කතරගම කිරිවෙහෙර, ශ්‍රී පාදස්ථානය, අනුරාධපුර අටමස්ථානය කේන්ද්‍ර කර ගනිමින් ස්වර්ණමාලි චෛත්‍යාරාමය, ලංකාරාමය ඇතුළු විහාරස්ථානවල සහ මරදාන විද්‍යෝදය පරිවෙන ඇතුළු දිවයිනේ විවිධ ප්‍රදේශවලින් ජනාධිපති නිල නිවස වෙත වැඩම කළ නායක ස්වාමින් වහ්නසේලා සෙත් පිරිත් සජ්ජයනා කර ඉදිරි ජනාධිපතිවරණ ජයග්‍රහණය වෙනුවෙන් ජනාධිපතිවරයා
වෙත ආශිර්වාද පළ කළහ.
