මේ දිනවල ඇද හැලෙන අධික වර්ෂාව හේතුවෙන් මේ වනවිට ප්‍රධාන ජලාශ කිහිපයක වාන් දොරටු විවෘත කර ඇති බව වාරිමාර්ග දෙපාර්තමේන්තුව පවසයි. දින දෙකක් තුළ ජලාශවල ජල මට්ටම සියයට 4කින් ඉහළ ගොස් ඇති අතර අද වනවිට ජල ධාරිතාව 70%ක් දක්වා වැඩි වී තිබේ.
කාලගුණ විද්‍යා දෙපාර්තමේන්තුව නිවේදනයක් නිකුත් කරමින් පවසන්නේ වර්ෂාපතනයේ යම් අඩුවීමක් අද දිනයේ වාර්තා වුවත් වැසි තත්ත්වය ඉදිරි පැය 48ක් දක්වා තවදුරටත් පවතින බවයි.
මේ වනවිට දැදුරු ඔයෙහි වාන් දොරටු දෙකක් අඩිය බැගින් විවෘත කර ඇති අතර කුඹුල්වානා ඔය ජලාශය උපරිම ධාරිතාවයට ළඟා වී තිබේ.
අනුරාධපුර දිස්ත්‍රික්කයේ රාජාංගනය ජලාශය වාන් දොරටු 4ක් අඩි දෙක බැගින් විවෘත කර ඇති අතර අංගමුව ජලාශය වාන් දොරටු දෙකක් අඩි බැගින් විවෘත කර තිබේ.
අම්පාර දිස්ත්‍රික්කයේ රඹකැන් ඔය ජලාශය වාන් දොරටු දෙකක් අඟල් 4 බැගින් විවෘත කර ඇති අතර මඩකලපුව දිස්ත්‍රික්කයේ උන්නිච්චි ජලාශයේ වාන් දොරටු එකක් අඟල් 6 බැගින් විවෘත කර ඇත.