රටේ ආර්ථිකය යළි ගොඩනැංවීම වෙනුවෙන් ජනප්‍රිය නොවන දැඩි තීන්දු ගැනීමට සිදු වූ බවත් අභියෝගවලට මුහුණදීමේ ආත්මශක්තිය තමා රාජකීය සිසුවෙකු ලෙස ප්‍රගුණ කර ඇති බවත් ජනාධිපති රනිල් වික්‍රමසිංහ පැවසීය.
ජනාධිපතිවරයා මේ බව සඳහන් කළේ කොළඹ හිල්ටන් හෝටලයේදී පැවති කොළඹ රාජකීය විද්‍යාලයීය නීතිඥ සංගමයේ වාර්ෂික මහා සභා රැස්වීමේ ප්‍රධාන ආරාධිත අමුත්තා ලෙස සහභාගී වෙමිනි.
අක්වෙරළ ආර්ථික නීතිය පිළිබඳ විශේෂඥ දැනුමක් ලබා ගන්නා ලෙසත්, වරාය නගරයේ නව නීති ප්‍රවර්ධනය වෙනුවෙන් කමිටුවක් පිහිටුවන ලෙසත් ජනාධිපති රනිල් වික්‍රමසිංහ මහතා තරුණ නීතිඥවරුන්ට යෝජනා කළේය.
අක්වෙරළ ආර්ථික නීතියක් සහිත මූල්‍ය මධ්‍යස්ථානය ලෙස නව වරාය නගරය සංවර්ධනය කළයුතු බව ද ජනාධිපතිවරයා පෙන්වා දුන්නේය. තමා රාජකීය විද්‍යාලයීය සිසුවෙකු ලෙස ගත කළ කාලය සහ සිය චරිතය හා වගකීම් සහගත බව හැඬගස්වා ගැනීමට විද්‍යාලයෙන් ලැබුණු දායකත්වය ජනාධිපතිවරයා මෙහිදී සිහිපත් කළේය.
මෙරට නීති ක්ෂේත්‍රය වෙනුවෙන් රාජකීය විද්‍යාලය ඉටුකර ඇති කාර්යභාරය මෙහිදි ඇඟයීමට ලක් කළ ජනාධිපතිවරයා ඉදිරියේදී මතුවිය හැකි නව නීති ක්ෂේත්‍ර පිළිබඳව ද තරුණ නීතිඥවරුන්ව දැනුවත් කළේය. වරාය නගරය මූල්‍ය මධ්‍යස්ථානයක් බවට පත් කිරීමට අදාළ නීතිමය ක්ෂේත්‍රවල මූලික ආරම්භයක් ලබා ගැනීමට එහිදී තරුණ නීතීඥයින් දිරිමත් කළ ජනාධිපතිවරයා වගකීම් සහ නායකත්ව භූමිකාවන්හි වැදගත්කම ද අවධාරණය කරන ලදී.
මෙම අවස්ථාවේ පිළිගැනීමේ කථාව රාජකීය විද්‍යලයීය නීතීඥ සංගමයේ සභාපති රොහාන් සහබන්දු විසින් සිදු කළ අතර එහි ලේකම් ධූරයෙන් නික්ම යන හර්ෂණ මාත්‍රආරච්චි විසින් පසුගිය වසරේ වාර්තාව සභාවට ඉදිරිපත් කරනු ලැබීය.
නීතිපති සංජය රාජරත්නම්, රාජකීය විද්‍යාලයේ විදුහල්පති ආර්. එම්. රත්නායක යන මහත්වරු ඇතුළු පිරිසක් මෙම අවස්ථාවට සහභාගි වූහ.