බ්‍රිතාන්‍යය රජය විසින් ‘සිනාසෙන වායුව’ නමින් හැඳින්වෙන නයිට්‍රස් ඔක්සයිඩ් (N2O) භාවිත කිරීම තහනම් කර තිබෙනවා.
රොයිටර්ස් පුවත් සේවය වාර්තා කළේ මෙම වායුව භාවිත කිරීම හෝ ළඟ තබා ගැනීම තහනම් කර ඇත්තේ සමාජ විරෝධී හැසිරීම් මැඩලීම සඳහා බවයි.
ඒ අනුව අද දින සිට මෙම නව නීතිය බ්‍රිතාන්‍යය තුළ බලාත්මක වනු ඇති.
මෙම වායුව භාවිත කර බොහෝ පුද්ගලයින් විෂ මත්ද්‍රව්‍ය නිෂ්පාදනය, භාවිත කිරීම සහ විකිණීමට යොමු ව සිර දඬුවම්වලට ලක් ව ඇති බව ද එරට මාධ්‍ය වාර්තා කර තිබෙනවා.
මෙම වායුව මගින් ප්‍රීතිය හා විනෝදය ඇති කළද, එය භාවිත කිරීම තුළින් අයහපත් සෞඛ්‍ය රටා ගොඩනැගෙන බවයි බ්‍රිතාන්‍ය සෞඛ්‍ය අංශ පෙන්වාදෙන්නේ.
එමෙන්ම මෙම වායුව භාවිත කර, සැකසූ මත්ද්‍රව්‍ය හේතුවෙන් දිගු කලක සිට පොදු ස්ථානවල පවා සමාජ විරෝධී හැසිරීම් සිදු වීමට එය දායක වී ඇති බවත්, එය ප්‍රජාව විනාශ කිරීමට හේතුවක් බවත්, එය අනුමත කළ නොහැකි බව ද බ්‍රිතාන්‍යයේ පොලිස් අමාත්‍ය ක්‍රිස් ෆිල්ප් ප්‍රකාශයක් නිකුත් කරමින් කියා සිටියා.
නව තහනම යටතේ සිනහ වායුව නැවත නැවතත් අනිසි ලෙස භාවිතා කරන පුද්ගලයින්ට දඩ හෝ වසර දෙකක සිර දඬුවමකට යටත් විය හැකි බවත් එය මත්ද්‍රව්‍ය ගනුදෙනු කිරීමේ දී යොදා ගතහොත් උපරිම සිර දඬුවම වසර 14 දක්වා වැඩි වන බව ද වාර්තා වනවා.
සෞඛ්‍ය අමාත්‍යාංශයේ සංඛ්‍යා ලේඛනවලට අනුව නයිට්‍රස් ඔක්සයිඩ් යනු වයස අවුරුදු 16 ත් 24 ත් අතර තරුණයින් විසින් භාවිතා කරන තුන්වන තැන හොබවන වඩාත් සුලබ ඖෂධයක්.
අධික ලෙස භාවිත කිරීම රක්තහීනතාවට හේතු විය හැකි බවත්, දරුණු සෞඛ්‍ය ප්‍රතිඵල ලෙස ස්නායු ආබාධ හෝ අංශභාගය ඇති විය හැකි බවද වාර්තා වනවා.