රක්ෂිත බන්ධනාගාර ගත කර සිටින හිටපු අමාත්ය කෙහෙළිය රඹුක්වැල්ල ඇප මත මුදා හරින ලෙස ඉල්ලා ගොනුකර තිබෙන ප්රතිශෝධන පෙත්සම නිෂ්ප්රභ කරන ලෙස නීතිපතිවරයා අද (25) කොළඹ මහාධිකරණය හමුවේ මූලික විරෝධතා මතු කළා.
එම පෙත්සම අද කොළඹ මහාධිකරණ විනිසුරු සුජීව නිශ්ශංක ඉදිරියේ කැඳවනු ලැබුවා.
එම අවස්ථාවේදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල් ලක්ගිමිනී ගිරිහාගම මෙනවිය මෙම විරෝධතා මතු කළා.
කෙහෙළිය රඹුක්වැල්ලගේ ඇප ඉල්ලීම ප්රතික්ෂේප කරමින් ඉකුත් පෙබරවාරි මස 29 වැනිදා මාළිගාකන්ද මහේස්ත්රාත් අධිකරණය විසින් ප්රකාශයට පත් කළ තීන්දුවේ පිටපත් මෙතෙක් ලැබී නොමැති බව කෙහෙළිය රඹුක්වැල්ල වෙනුවෙන් පෙනී සිටි ජනාධිපති නීතීඥ අනුජ ප්රේමරත්න අධිකරණයට දැනුම් දුන්නා.
ඒ අනුව අදාළ තීන්දුවේ පිටපතක් ඉල්ලුම් කර තිබේ දැයි මාළිගාකන්ද මහේස්ත්රාත් අධිකරණයේ රෙජිස්ටාර්වරයා අමතා කරුණු සොයා බලා අධිකරණයට දැනුම් දෙන ලෙස විනිසුරුවරයා විසින් කොළඹ මහාධිකරණයේ රෙජිස්ට්රාර්වරයා වෙත නියෝග කළා.