මීගමුව බන්ධනාගාරයේ ඇති වූ නොසන්සුන්තාව සම්බන්ධයෙන් අපරාධ පරීක්ෂණ දෙපාර්තමේන්තුව (CID) මෙතෙක් සිදු කර ඇති සියලු විමර්ශනවල ප්රගතිය ඇතුළත් වාර්තාවක් ජූලි 16 වැනිදා අධිකරණයට ඉදිරිපත් කරන ලෙස මීගමුව ප්රධාන මහේස්ත්රාත් ශිලනි පෙරේරා මහත්මිය නියෝග කර තිබේ.
මෙම නියෝගය නිකුත් කෙරුණේ අදාළ නඩුව යළි කැඳවූ අවස්ථාවේදී CID විසින් අධිකරණයට ඉදිරිපත් කළ වැඩිදුර වාර්තාව සලකා බැලීමෙන් අනතුරුවය.
CID අධිකරණයට දැනුම් දුන්නේ, කටුවැල්ලේගම සුරේෂ් නමැති රැඳවියෙකු බන්ධනාගාර නිලධාරීන්ට මරණ තර්ජන එල්ල කර කලහකාරී ලෙස හැසිරීමත් සමඟ නිලධාරීන් සහ රැඳවියන් අතර ගැටුමක් හටගෙන ඇති බවයි. මූලික විමර්ශනවලදී අනාවරණය වී ඇත්තේ, තමන්ට ව්යායාම සඳහා ලබාදී ඇති කාලය ප්රමාණවත් නොවන බවට චෝදනා කරමින් ඔහු එලෙස හැසිරී ඇති බවයි.
මෙම ගැටුමෙන් බන්ධනාගාර පොලිස් හදිසි උපක්රමික බළකායේ (බන්ධ පොලිස්) නිලධාරීන් 10 දෙනෙකු සහ රැඳවියන් 20 දෙනෙකු මියගොස් ඇති අතර, බන්ධනාගාර දේපළවලට රුපියල් කෝටි 12කට අධික අලාභයක් සිදුවී ඇති බවද වාර්තා වේ.
සිද්ධිය සම්බන්ධයෙන් මේ වන විට බන්ධනාගාර නිලධාරීන් සහ රැඳවියන් ඇතුළු පුද්ගලයින් 287 දෙනෙකුගෙන් ප්රකාශ සටහන් කරගෙන ඇති බව CID අධිකරණයට දැනුම් දී තිබේ. එමෙන්ම ගැටුම සිදුවූ අවස්ථාවේ මීගමුව බන්ධනාගාරයේ රඳවා සිටි සියලු රැඳවියන්ගෙන්ද වෙන වෙනම ප්රකාශ ලබා ගැනීමට නියමිත බව සඳහන් කළේය.
ගැටුමෙන් අනතුරුව බොහෝ රැඳවියන් දිවයිනේ වෙනත් බන්ධනාගාර වෙත මාරු කර ඇති බැවින්, ඔවුන්ගෙන්ද ප්රකාශ සටහන් කර ගැනීමට අවශ්ය අවසර සහ පහසුකම් සලසා දෙන ලෙස වැඩබලන බන්ධනාගාර කොමසාරිස් ජනරාල්වරයාට නියෝගයක් නිකුත් කරන ලෙස CID අධිකරණයෙන් ඉල්ලා සිටියේය.
එම ඉල්ලීම පිළිගත් ප්රධාන මහේස්ත්රාත්වරිය, දිවයිනේ ඕනෑම බන්ධනාගාරයක රඳවා සිටින අදාළ රැඳවියන්ගෙන් ප්රකාශ සටහන් කර ගැනීම සඳහා CID වෙත අවශ්ය සියලු පහසුකම් සහ අවසර ලබාදෙන ලෙස වැඩබලන බන්ධනාගාර කොමසාරිස් ජනරාල්වරයාට නියෝග කළාය.
ඊට අමතරව, මෙම සිද්ධිය සම්බන්ධයෙන් මෙතෙක් සිදු කළ සියලු විමර්ශනවල ප්රගතිය ඇතුළත් සම්පූර්ණ වාර්තාව ජූලි 16 වැනිදා අධිකරණයට ඉදිරිපත් කරන ලෙසද CID වෙත තවදුරටත් නියෝග කර තිබේ.
පොලිස්පති නීතීඥ ප්රියන්ති වීරසූරියගේ උපදෙස් මත, අපරාධ පරීක්ෂණ දෙපාර්තමේන්තුව භාර නියෝජ්ය පොලිස්පති ශානි අබේසේකරගේ සෘජු අධීක්ෂණය යටතේ මෙම සිද්ධිය සම්බන්ධයෙන් අංශ කිහිපයක් ඔස්සේ වැඩිදුර විමර්ශන ක්රියාත්මක වේ.
මීට පෙර මීගමුව මූලස්ථාන පොලිසිය විසින් සිදු කළ සියලු විමර්ශන, ප්රධාන මහේස්ත්රාත්වරියගේ නියෝගයකට අනුව CID වෙත භාර දී ඇති අතර, එය සිදුකර ඇත්තේ පොලිස්පතිවරයා වෙනුවෙන් නියෝජ්ය පොලිස්පති ශානි අබේසේකර කළ ඉල්ලීමක් සැලකිල්ලට ගනිමිනි.