මුලතිව්, මුල්ලියාවේලි විද්‍යානන්ද මහා විද්‍යාලයේ ක්‍රීඩාංගණය අසළ තිබී මෝටාර් උණ්ඩ 05ක් හමු වී තිබේ.
මුල්ලියාවේලි පොලිසිය පැවසුවේ ඊයේ (01) විද්‍යාලීය ක්‍රීඩාංගණයේ වැට සීමාව පිරිසිදු කිරීමේදී අදාළ මෝටාර් උණ්ඩ හමු වී ඇති බවයි.
සිද්ධිය සම්බන්ධයෙන් වහා ක්‍රියාත්මක වූ පොලිසිය පොලිස් විශේෂ කාර්ය බළකා බෝම්බ නිශ්ක්‍රීය අංශයේ සහයෝගයෙන් අදාළ මෝටාර් උණ්ඩ විද්‍යාලය අසළින් ඉවත් කිරීමට පියවර ගෙන තිබේ.
යුධ සමයේ එල් ටී ටී ඊ සංවිධානය විසින් සඟවා ගිය මෝටාර් උණ්ඩ කිහිපයක් එලෙස හමුවන්නට ඇති බවයි පොලිසිය සැක පළ කරන්නේ.
සිද්ධිය සම්බන්ධයෙන් මුල්ලියාවේලි පොලිසිය වැඩිදුර පරීක්ෂණ මෙහෙයවයි.