2027 වසර වන විට සුනඛයන් ඝාතනය කිරීම සහ ඔවුන්ගේ මස් විකිණීම නතර කිරීම අරමුණු කර ගනිමින් දකුණු කොරියාව නව නීතියක් සම්මත කර තිබෙනවා.
කොරියානුවන්ගේ බලු මස් කෑමේ සියවස් ගණනාවක් පැරණි පුරුද්ද අවසන් කිරීම නව නීතියේ අරමුණයි.
පසුගිය දශක කිහිපය තුළ බලු මස් රාත්‍රී භෝජන සංග්‍රහයන්හි ප්‍රසාදයට ලක් නොවූ අතර විශේෂයෙන්ම යෞවනයන් එයින් වැළකී සිටින බවයි විදෙස් මාධ්‍ය වාර්තා පෙන්වා දෙන්නේ.
නව නීතියට අනුව මාංශ පරිභෝජනය සඳහා සුනඛයන් ඇති දැඩි කිරීම හෝ ඝාතනය කිරීම තහනම් කරනු ලබන අතර බලු මස් බෙදා හැරීම හෝ විකිණීම ද තහනම් වනු ඇති. මෙම කටයුතු තවදුරටත් සිදු කරන පුද්ගලයන් සිර දඬුවමකට යටත් කිරීමට නව නිතිය අනුව හැකියාවක් පවතිනවා.
මස් වෙනුවෙන් සුනඛයන් දඩයම් කරන පුද්ගලයන්ට වසර තුනක සිරදඬුවමක් නියම විය හැකි අතර මස් පිණිස බල්ලන් ඇති කරන හෝ බලු මස් විකුණන අයට උපරිම වශයෙන් වසර දෙකක සිර දඬුවමක් නියම කළ හැකියි. කෙසේ වෙතත්, බලු මස් පරිභෝජනය නීති විරෝධී වන්නේ නැහැ.
නව නිතිය වසර තුනකින් ක්‍රියාත්මක වන අතර එමඟින් ගොවීන්ට සහ ආපනශාලා හිමියන්ට විකල්ප රැකියා සහ ආදායම් මාර්ග සොයා ගැනීමට කාලය ලබා දී තිබෙනවා. ඔවුන්ගේ ව්‍යාපාර ක්‍රමානුකූලව ඉවත් කිරීමේ සැලැස්මක් ඔවුන්ගේ පළාත් පාලන ආයතන වෙත ඉදිරිපත් කිරීමට ඔවුන්ට සිදුවනු ඇති.
බලු මස් ගොවීන්ට, මස් වෙළෙන්දන්ට සහ ආපනශාලා හිමියන්ට පූර්ණ සහයෝගය ලබා දෙන බවට දකුණු කොරියා රජය පොරොන්දු වී ඇති අතර, ඔවුන්ගේ ව්‍යාපාර වසා දැමීමට ද බල කෙරෙනු ඇති.
රජයේ සංඛ්‍යාලේඛනවලට අනුව, පසුගිය 2023 වසරේදී දකුණු කොරියාවේ සුනඛ මස් අවන්හල් 1,600ක් සහ සුනඛ ගොවිපල 1,150ක් පමණ තිබූ බව සඳහන්.
සමහර වැඩිහිටි දකුණු කොරියානුවන් අතර ‘බොෂින්ටැං’ නමින් හඳුන්වන සුනඛ මස් ඉස්ටුවක් ප්‍රණීත ආහාරයක් ලෙස සලකනු ලැබුණ ද මස් තවදුරටත් තරුණයින් අතර ජනප්‍රිය නොවන බවටයි අනාවරණ වී ඇත්තේ.
පසුගිය වසරේ සිදු කළ මත විමසුමකට අනුව, මිනිසුන්ගෙන් 8% ක් පමණක් පසුගිය මාස 12 තුළ බලු මස් අනුභව කළ බව ප්‍රකාශ කර ඇති අතර එය 2015 දී පැවති 27% ක ප්‍රමාණයට වඩා විශාල අඩුවීමක්.
මත විමසුමට ලක් වූවන්ගෙන් පහෙන් එකකට වඩා අඩු ප්‍රමාණයක් කියා සිටියේ ඔවුන් මස් පරිභෝජනයට සහාය දක්වන බවයි.
1980 ගණන්වල සිට පැවත එන දකුණු කොරියාවේ රජයන් සුනඛ මස් තහනම් කිරීමට ප්‍රතිඥා දුන් නමුත් ප්‍රගතියක් ලබා ගැනීමට අපොහොසත් වුණා. වත්මන් ජනාධිපති යූන් සුක් යෙයෝල් සහ ජනාධිපති ආර්යාව කිම් කියෝන් හී ප්‍රසිද්ධ සත්ව ලෝලීන් ලෙසටයි සැලකෙන්නේ. මෙම යුවළට සුනඛයන් හය දෙනෙකු සිටින අතර, කිම් මහත්මිය සුනඛයන් ආහාරයට ගැනීමේ පුරුද්ද අවසන් කරන ලෙස ඉල්ලා තිබෙනවා.
මෙම නව තහනම ලබා ගැනීම සඳහා දිගු කලක් තිස්සේ සටන් කරමින් සිටින සත්ව හිමිකම් කණ්ඩායම් අද ලැබුණු ප්‍රතිඵලය පැසසුමට ලක් කර ඇති බව සඳහන්.
බලු මස් ගොවීන් තහනමට එරෙහිව උද්ඝෝෂණ ද සංවිධාන කර තිබුණා. ඔවුන් තර්ක කළේ යෞවනයන් අතර ජනප්‍රියත්වය අඩුවීම සැලකිල්ලට ගෙන, කාලයත් සමඟ මෙම පුරුද්ද ස්වාභාවිකවම මිය යාමට ඉඩ දිය යුතු බවයි. බොහෝ ගොවීන් සහ ආපනශාලා හිමියන් වයෝවෘද්ධ අය වන අතර ඔවුන්ට ජීවිතයේ ප්‍රමාද වී තම ජීවනෝපාය මාරු කිරීම දුෂ්කර බව ප්‍රකාශ කර තිබෙනවා.