බංග්ලාදේශ ජාතික කාන්තා ක්‍රිකට් කණ්ඩායමේ ප්‍රධාන පුහුණුකරු ලෙස කටයුතු කළ හෂාන් තිලකරත්න මහතා එම තනතුරෙන් ඉවත්වීමට තීරණය කර ඇති බව බංග්ලාදේශ ක්‍රිකට් ආයතනය නිල වශයෙන් දැනුම් දී තිබේ.
2022 වසරේ ඔක්තෝබර් මාසයේදී වසර දෙකක ගිවිසුමක් යටතේ පත්වූ තිලකරත්න මහතාගේ සේවා කාලය මෑතකදී අවසන් වුවද, බටහිර ඉන්දීය කොදෙව් සංචාරය දක්වා එය දීර්ඝ කෙරිණි.
බංග්ලාදේශ ක්‍රිකට් මණ්ඩලයේ කාන්තා අංශයේ ප්‍රධානී හබිබුල් බෂාර් මහතා ක්‍රික්බස් වෙබ් අඩවියට අදහස් දක්වමින් කියා සිටියේ බටහිර ඉන්දීය කොදෙව් සංචාරයේදී තිලකරත්න මහතා තවදුරටත් සේවය කිරීමට අකමැති බව ප්‍රකාශ කර ඇති බවයි.
තිලකරත්න මහතාගේ පුහුණුකාර කාලය තුළ කණ්ඩායමේ ක්‍රියාකාරිත්වය පිළිබඳව බංග්ලාදේශ ක්‍රිකට් මණ්ඩලය තෘප්තිමත් නොවන බව ක්‍රික්බස් වාර්තා කරයි. ඒ අනුව ගිවිසුම අලුත් කිරීමට ආයතනය උනන්දුවක් නොදැක්වූ බවත්, මෙය වටහාගත් තිලකරත්න මහතා ඉල්ලා අස්වීමට තීරණය කළ බවත්, ඉදිරියේදී දේශීය පුහුණුකරුවෙකු පත් කිරීමට සැලසුම් කර ඇති බවත් බංග්ලාදේශ ක්‍රිකට් මණ්ඩලය පවසයි.
ජනවාරි මාසයේ පැවැති බටහිර ඉන්දීය කොදෙව් සංචාරය තිලකරත්න මහතාගේ අවසාන වගකීම විය. එහිදී බංග්ලාදේශ කණ්ඩායම එක්දින තරගාවලිය 2-1ක් ලෙසත්, විස්සයි20 තරගාවලිය 3-0ක් ලෙසත් පරාජයට පත්විය.
එක්දින තරගාවලිය ජයග්‍රහණය කළේ නම් බංග්ලාදේශ කාන්තාවන්ට ඉදිරි ලෝක කුසලාන තරගාවලියට සෘජුව සුදුසුකම් ලැබීමට හැකියාව තිබුණි. දැන් ඔවුන්ට සුදුසුකම් ලබාගැනීමේ තරගාවලියේදී බටහිර ඉන්දීය කොදෙව් සහ පාකිස්තාන කණ්ඩායම් වැනි ප්‍රබල ප්‍රතිවාදීන් හමුවේ තරග කිරීමට සිදුවනු ඇත.