ජපානයේ පාලක පක්ෂයේ නායකයා තේරීම සඳහා පැවැති ඡන්ද විමසීමෙන් ජයග්‍රහණය කළ හිටපු විදේශ ඇමැති ෆුමියෝ කිෂිඩා එරට මීළඟ අගමැතිවරයා වීම තහවුරු වී ඇතැයි ජපාන මාධ්‍ය වාර්තා කළේය. පක්ෂයේ නව නායකයා වනු ඇතැයි අනාවැකි පළවී තිබූ ජපානයේ කොවිඩ් එන්නත්කරණය සඳහා පත් කර සිටි ඇමති ටාරෝ කොනෝ පරාජය කරමින් කිෂිඩා පාලක පක්ෂයේ නව නායකයා ලෙස තේරී පත් වූයේ ඡන්ද 257ක් ලබා ගනිමිනි. පාලක ලිබරල් ප්‍රජාතන්ත්‍රවාදී පක්ෂයේ හිටපු අගමැති යොෂිහිඩේ සුගා පසුගියදා සිය තනතුරෙන් ඉල්ලා අස්වූ අතර, පක්ෂයේ නව නායකයා ලෙස 64 හැවිරිදි කිෂිඩා ලබන සඳුදා ජපානයේ නව අගමැතිවරයා ලෙස පත්වීමට නියමිතය. එමෙන්ම ලබන නොවැම්බර් මාසයේ එරට පැවැත්වීමට නියමිත මහ මැතිවරණයේදී ඔහු ලිබරල් ප්‍රජාතන්ත්‍රවාදී පක්ෂයට නායකත්වය දෙමින් මැතිවරණ සටනට එක්වනු ඇත.
පක්ෂයේ නව නායක කිෂිඩා හිටපු අගමැතිවරයකු වන ෂින්සේ අබේගේ අනුප්‍රාප්තිකයා වූවද, පසුගිය මැතිවරණයේදී ඔහු පසෙකට දමමින් සුගාට අගමැතිධුරය ලබාදීමට අබේ කටයුතු කර තිබිණි.