ටෝකියෝ ඔලිම්පික් උලෙළේ මීටර් 1500 කාන්තා රන් පදක්කම කෙන්යාව සතු කර ගත් අතර, පිරිමි 1500 රන් පදක්කම නෝර්වේ සතු කර ගනියි. කෙන්යාවේ ෆේයිත් කිප්යගොන් මිනිත්තු 3:53.11කින් මේ ඉසව්වේ පිට පිට දෙවැනි රන් පදක්කම දිනා ගැනීම විශේෂත්වයකි. ඇය 2016 රියෝ ඔලිම්පික් උලෙළේදී තබා තිබූ මිනිත්තු 4:08.92ක් වූ ඇගේම වාර්තාව මකා දමා නව ඔලිම්පික් වාර්තාවක් බිහි කිරීමට සමත් වූවාය. මෙහි රිදී පදක්කම බ්‍රිතාන්‍යයේ ලවුරා මුයිර් මිනිත්තු 3:54.50කින් හා ලෝකඩ පදක්කම නෙදර්ලන්තයේ සිනේ හසන් මිනිත්තු 3:55.86කින් දිනා ගත්හ. හසන් රියෝ ඔලිම්පික් උලෙළේ 5 වැනි තැනට පත් වූ ක්‍රීඩිකාව වේ.
පිරිමි 1500 රන් පදක්කම දිනාගත් නෝර්වේහී ජාකොබ් ඉන්ගර්බ්‍රිග්ස්ටන් මිනිත්තු 3:28.32කින් ඔලිම්පික් වාර්තාවක් ද සමඟ පෙරමුණ ගත්තේය. කෙන්යාවේ තිමෝතී චෙරියොට් මිනිත්තු 3:29.01කින් රිදී පදක්කම හා බ්‍රිතාන්‍යයේ ජොස් කීර් මිනිත්තු 3:29.05කින් ලෝකඩ පදක්කම දිනා ගත්හ.
මේ අතර, පිරිමි මීටර් 5000 රන් පදක්කම උගන්ඩාවේ ජෝසුවා චෙප්ටිගේයි මිනිත්තු 12:58.15කින් දිනා ගැනීමට සමත් විය. ඔහු පසුගිය රියෝ ඔලිම්පික් උලෙළේදී මේ ඉසව්වේ 8 වැනි තැනට පත් වූ අතර, මෙවර මුල සිටම ඉදිරියෙන් සිට තරගය නිම කළේය. රිදී පදක්කම කැනඩාවේ මොහොමඩ් අහමඩ් මිනිත්තු 12:58.61කින් දිනාගත් අතර, ලෝකඩ පදක්කම අමෙරිකාවේ පාවුල් චෙලිමෝ මිනිත්තු 12:59.05කින් දිනා ගත්ත්ය. චෙලිමෝ රියෝ ඔලිම්පික් උලෙළේ රිදී පදක්කම දිනා ගත්තද මෙවර පියවරක් පසුපසට ගියේය.
ප්‍රින්ස් ගුණසේකර
ජපානයේ ටෝකියෝ නුවර සිට..