විදුලි බිල ඉහළ දමන ලෙස ලංකා විදුලිබල මණ්ඩලය කළ ඉල්ලීම කැබිනට් මණ්ඩලයට ඉදිරිපත් නොකරන බව විදුලිබල හා බලශක්ති අමාත්‍ය කංචන විජේසේකර පැවසීය.
සිය ෆේස්බුක් ගිණුමේ සටහනක් තමබින් අමාත්‍යවරයා කියා සිටියේ පුනර්ජනනීය බලශක්ති උත්පාදන සැලසුම්වලට ලංවිම සහය නොදක්වන බැවින් මෙම තීරණය ගත් බවයි.
විදුලිබල මණ්ඩලය පුනර්ජනනීය ව්‍යාපෘති ඉදිරියට ගෙන යාමට ඉඩ දිය යුතු අතර ඔවුන්ගේම වැටුප් ගෙවීම සඳහා ගාස්තු වැඩි කරනවාට වඩා විදුලි උත්පාදන පිරිවැය අඩු කළ යුතු බව ඔහු එම සටහනෙන් පෙන්වා දී තිබේ.
ඔහු ප්‍රකාශ කර ඇත්තේ සෑම වසර 3කට වරක්ම තමන්ගේ වැටුප් 25%කින් වැඩි කිරීමට ලංවිමට සාමූහික ගිවිසුමක් ඇති බවයි. පුනර්ජනනීය බලශක්තිය හෝ විදුලි උත්පාදනයේ පිරිවැය අඩු කිරීම සඳහා කිසිදු සැලසුමක් නොමැතිව වැටුප් හා උත්පාදන පිරිවැයේ අධික පිරිවැය එමගින් පාරිභෝගිකයින් මත පැටවෙන බව අමාත්‍යවරයා පෙන්වා දී ඇත.
කෙසේවෙතත් අමාත්‍යවරයා අවධාරණය කරන්නේ මෙම ක්‍රමය වෙනස් විය යුතු බවයි.
