චීන පොහොර නැව සම්බන්ධ ගැටළුවේදී දෙරට අතර මිත්‍රත්වයට හානි නොවන ආකාරයෙන් කටයුතු කිරීම සඳහා ක්‍රියාවලියක් සැකසීමට විදේශ කටයුතු අමාත්‍යාංශයට භාරදීමට කෘෂිකර්ම අමාත්‍යාංශය තීරණය කර තිබේ.
චීනයේ කින්ඩාඕ සීවින් බයෝටෙක් සමාගම කාබනික පොහොර ගනුදෙනුවට අදාළව ඇතිකරගත් සමථය ප්‍රකාරව කටයුතු නොකිරීම හේතුවෙන් එම සමාගම ශ්‍රී ලංකාව තුළ අසාදු ලේඛනගත කරන ලෙස විගණකාධිපතිවරයා රජයට නිර්දේශ තිබුණි.
මේ සම්බන්ධයෙන් විදේශ කටයුතු අමාත්‍යාංශය සහ ශ්‍රී ලංකාවේ චීන තානාපතිවරයා සමඟ තවදුරටත් සාකච්ඡා කිරීමට සූදානම් බව කෘෂිකර්ම අමාත්‍ය මහින්ද අමරවීර පැවසීය.
අමාත්‍යවරයා මේ බව ප්‍රකාශ කළේ ඊයේ (04) ඇඹිලිපිටිය ප්‍රදේශයේ ගොවිපලක නිරීක්ෂණ චාරිකාවකට එක්වෙමිනි.