තඹුත්තේගම ප්‍රදේශයේ පෞද්ගලික බැංකුවක් ඉදිරිපිටදී ඊයේ (26) දහවල් රුපියල් ලක්ෂ 223ක මුදලක් කොල්ලකෑමට උත්සාහ ගැනීමේ සිද්ධියට අදාළව තවත් සැකකරුවෙක් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ පොදුජන පෙරමුණ නියෝජනය කරමින් රාජාංගනය ප්‍රාදේශීය සභාවට තේරී පත් වූ මන්ත්‍රීවරයෙකු බවයි පොලිසිය පැවසුවේ.
ව්‍යාපාරිකයෙකු විසින් පෞද්ගලික බැංකුවක තැන්පත් කිරීමට රැගෙන ආ රුපියල් ලක්ෂ 223ක මුදලක් පැහැරගෙන යාමට තැත් කිරීමේදී එය සාර්ථකව ව්‍යර්ථ කිරීමට තඹුත්තේගම පොලිස් නිලධාරියෙක් සමත් වුණා.
එහිදී මංකොල්ලය සඳහා ආයුධ සන්නද්ධව පැමිණි සැකකරුවන් දෙදෙනා අත්අඩංගුවට ගැනීමටයි හැකි වුණේ.
48 හැවිරිදි හා 50 හැවිරිදි වියේ පසු වන සැකකරුවන් දෙදෙනා තඹුත්තේගම ප්‍රදේශයේ ම පදිංචිකරුවන් වන අතර ඔවුන් සතුව තිබූ බෝර 12 ගිනි අවියක්, බෝර 12 පතොරමක් සහ මන්නා පිහියක්ද පොලිස් භාරයට ගෙන තිබෙනවා.