කොරියාවේ සෝල් නුවර හැලොවින් උත්සවයක් අතරතුර තෙරපීමකින් මියගිය 27 හැවිරිදි මොහොමඩ් ජිනාඩ්ගේ පවුලට සහ ඔහුගේ අවසන් කටයුතු සඳහා කොරියානු රජය මූල්‍ය ආධාර ලබාදීමට තීරණය කර තිබේ.
මෙලෙස මිය ගිය තරුණයා සම්බන්ධයෙන් කොරියානු රජය සහ කොරියානු ජනතාව බලවත් ශෝකය පළ කළ බව කොරියානු තානාපතිවරයා අග්‍රාමාත්‍ය දිනේෂ් ගුණවර්ධන වෙත ප්‍රකාශ කර තිබේ.
තානාපතිවරයා ඊයේ අග්‍රාමාත්‍ය කාර්යාලයේදී අග්‍රාමාත්‍යවරයා හමුවී තම රජය වෙනුවෙන් ශෝකය පළ කළේය.
හැලොවීන් උත්සවය අතරතුර ඇති වූ තෙරපීමකින් තුවාල ලැබූ විදේශිකයින් 26 දෙනෙකු ඇතුළු ජීවිත 156ක් අහිමි වීම සම්බන්ධයෙන් ශ්‍රී ලංකාවේ රජය සහ ජනතාව වෙනුවෙන් ශෝකය පළ කරන බව අග්‍රාමාත්‍ය දිනේෂ් ගුණවර්ධන එහිදී ප්‍රකාශ කළේය.