කාශ්‍යප රජු පදිංචිව සිටි සීගිරියේ ‘සීත මාලිගාව’ ලබන මාර්තු මාසයේ සිට දෙස් විදෙස් සංචාරකයින්ට නැරඹීමට අවස්ථාව සලසා දෙන බව මධ්‍යම සංස්කෘතික අරමුදලේ අධ්‍යක්ෂ ජනරාල් මහාචාර්ය ගාමිණී රණසිංහ පැවසීය.
සීගිරිය පර්වතය නගින විට හමුවන පොකුණු හතර පසුවනවාත් සමග දකුණු දෙසට මීටර් 50 ක් පමණ ගමන් කරද්දී සීත මාළිගාව පිහිටි ස්ථානය දැකගත හැකිය. දැඩි වියළි කාලගුණයක් සහිත කාලයේදී කාශ්‍යප රජු මෙම සීත මාළිගාව භාවිත කළැයි සැලකේ.
කඳු ගැටයක් වැනි ස්ථානයක සීත මාළිගයේ නටඹුන් දැකිය හැකි නමුත් මාළිගය වටා පවතින විශාල කාණුව නිසා ඊට පිවිසීමට නොහැකිය. මෙම කාණුව හරහා පාලමක් යොදා සංචාරකයන්ට සීත මාළිගාව නැරඹීමට අවස්ථාව සලසා දෙන බව අධ්‍යක්ෂ ජනරාල්වරයා කීවේය.