කොවිඩ් 19 ‘බොහෝදුරට චීන රජය විසින් පාලනය කරන ලද රසායනාගාරයකින්’ උත්පාදනය වූවක් බව තම කාර්යාංශය විශ්වාස කරන්නේ යැයි FBI අධ්‍යක්ෂ ක්‍රිස්ටෝෆර් ව්රේ ප්‍රකාශ කර තිබේ.
ඔහු Fox News වෙත ප්‍රකාශ කර ඇත්තේ, ‘වසංගතයේ මූලාරම්භය බොහෝ විට රසායනාගාරයක වූ සිදුවීමක් වීමට වැඩි ඉඩක් ඇතැයි FBI විසින් දැන් දිගු කාලයක් තිස්සේ තක්සේරු කරනු ලැබ ඇති’ බවය.
වසංගත වෛරසය මතු වූ ආකාරය පිළිබඳ FBIහි රහසිගත විනිශ්චය පිළිබඳ පළමු මහජන තහවුරු කිරීම එය බව විදෙස් මාධ්‍ය වාර්තා කර ඇත. රසායනාගාරයකින් එය පැතිර ගිය බවට වූ න්‍යාය සාක්ෂි නොමැති බැවින් බොහෝ විද්‍යාඥයින් විසින් ප්‍රතික්ෂේප කරනු ලැබ තිබේ.
එමෙන්ම අනෙකුත් එක්සත් ජනපද රාජ්‍ය ආයතන FBI නිගමනයට වෙනස් නිගමන ඉදිරිපත් කර ඇත. අඩු නිශ්චිතභාවයකින් ඔවුන්ගෙන් සමහරෙකු පවසා ඇත්තේ වෛරසය රසායනාගාරයකින් ආරම්භ වූවක් නොව සතුන්ගෙන් මිනිසුන්ට සම්ප්‍රේෂණය වූවක් බවයි.
එහි මූලාරම්භ පිළිබඳව එක්සත් ජනපද රජයට පොදු එකඟතාවක් නොමැති බව ධවල මන්දිරය ප්‍රකාශ කර තිබේ. 2021 වසරේදී ඒකාබද්ධ චීන – ලෝක සෞඛ්‍ය සංවිධානයේ (WHO) පරීක්ෂණයක් මගින් රසායනාගාරයකින් එය පැතිර ගිය බවට වූ න්‍යාය හැඳින්වූයේ ‘අතිශයින් ම විය නොහැක්කක්’ යනුවෙනි.
කෙසේ වෙතත් ලෝක සෞඛ්‍ය සංවිධානයේ විමර්ශනය දැඩි ලෙස විවේචනයට ලක් වූ අතර ඉන් පසුව එහි අධ්‍යක්ෂ ජනරාල්වරයා නව පරීක්ෂණයක් ඉල්ලා තිබුණේ “සියලු උපකල්පන විවෘතව පවතින අතර වැඩිදුර අධ්‍යයනයක් අවශ්‍ය වේ” යැයි සඳහන් කරමිනි.
ව්රේ මහතාගේ ප්‍රකාශය පැමිණෙන්නේ, චීනයේ එක්සත් ජනපද තානාපතිවරයා කොවිඩ්හි මූලාරම්භය පිළිබඳව ‘වඩා අවංක විය යුතු’ ලෙස එරටින් ඉල්ලා සිටීමෙන් දිනකට පසුව ය.
#mawbima
