සීඝ්‍රයෙන් පැතිරෙන කෙරෝනා වසංගතය හමුවේ යළිත් සංචරණ සීමා පැනවීමේ කිසිදු සූදානමක් නැතැයි ආරක්ෂක මාණ්ඩලික ප්‍රධානී යුද හමුදාපති ජෙනරල් ශවේන්ද්‍ර සිල්වා පවසයි.
මේ මොහොතේ සියලුම රටවැසියන් සෞඛ්‍යාරක්ෂිත ක්‍රම අනුගමනය කරමින් වගකීමෙන් කටයුතු කිරීම අත්‍යවශය කරුණක් බව යුද හමුදාපතිවරයා අවධාරණය කරයි.
වර්තමානයේ සමාජය තුළින් හඳුනා ගන්නා කොරෝනා ආසාදිතයින්ගෙන් බහුතරයක් ඔමික්‍රොන් වෛරස් ප්‍රභේදයේ ආසාදිතයින් බව සෞඛ්‍ය ප්‍රවර්ධන කාර්යාංශයේ පවසයි.
ඊයේ (06) මෙරටින් තවත් කොරෝනා ආසාදිතයින් 1331 දෙනෙක් වාර්තාවීමත් සමග මෙරට සමස්ත කොරෝනා ආසාදිතයින් සංඛ්‍යාව 618, 520ක් දක්වා ඉහළ ගියේය.
තවත් කොරෝනා මරණ 23ක් ඊයේ වාර්තා වූ අතර සෞඛ්‍ය සේවා අධ්‍යක්ෂ ජනරාල්වරයා විසින් එම මරණ පෙරේදා තහවුරු කර ඇත. ඒ අනුව මේ වනවිට මෙරට කොරෝනා ආසාදනය වීමෙන් පුද්ගලයින් 15,595 දෙනෙකු මියගොස් තිබේ.