ගම්පහ තක්‍ෂිලා විද්‍යාලයේ අපොස උසස් පෙළ විභාගයේ රාජකාරී කටයුතු භාරව සිටි ශාලාධිපතිවරයෙකුගේ සහ සහකාර ශාලාධිපතිවරයෙකුගේ වැඩ තහනම් කර තිබේ.
අදාළ විභාග මධ්‍යස්ථානයේදී චිත්‍ර විෂයට පෙනී සිටි සිසුන් දෙදෙනෙකුට එම විෂයට අදාළ දෙවන කොටසේ ප්‍රශ්න පත්‍රය ලබානොදීම හේතුවෙන් එම පියවර ගෙන ඇත.
අදාළ විභාග ශාලාව තුළ චිත්‍ර විෂයට පෙනී සිට ඇත්තේ සිසුන් දෙදෙනෙකු පමණක් වන අතර එම සිසුන් දෙදෙනා විභාග දෙපාර්තමේන්තුවට පැමිණිලි කර ඇත්තේ තමන්ට අදාළ ප්‍රශ්න පත්‍රයේ දෙවන කොටස විභාග ශාලාවේ සිටි නිලධාරීන් ලබානොදුන් බවයි.
පළමු ප්‍රශ්න පත්‍රයට පිළිතුරු ලියා අවසන් කිරීමෙන් පසු දෙවන ප්‍රශ්න පත්‍රය ලබාදෙන ලෙස විභාග ශාලාවේ සිටි ගුරුවරියකගෙන් ඉල්ලා සිටියද එම ප්‍රශ්න පත්‍රය නොලැබුණු බවට එම සිසුන් දෙදෙනා විභාග දෙපාර්තමේන්තුවට පැමිණිලි කර ඇත.
මෙම සිද්ධිය සම්බන්ධයෙන් සිදුකළ විමර්ශනයකින් පසු අදාළ නිලධාරීන් දෙදෙනාගේ වැඩතහනම් කළ බව විභාග දෙපාර්තමේන්තුව පවසයි.