ශ්‍රී ලංකාවේ ප්‍රවාහන පද්ධතියට මෝටර් නොවන ප්‍රවාහන ක්‍රම හඳුන්වා දීමට පරිසර අමාත්‍ය මහින්ද අමරවීර විසින් ගෙන එනු ලැබූ අමාත්‍ය මණ්ඩලය පත්‍රිකාවට ඊයේ රැස්වූ කැබිනට් මණ්ඩලයේ අනුමැතිය හිමිව තිබේ.
මෝටර් නොවන ප්‍රවාහන ක්‍රම භාවිතය තුළින් වායු දූෂණය අවම කිරීම මෙන්ම ශරීර සෞඛ්‍ය, වාතයේ ගුණාත්මකභාවය, පරිසරය, දේශගුණික විපර්යාස සහ පුද්ගල මූල්‍ය කෙරෙහි ධනාත්මක බලපෑමක් ඇති කරන බව පරිසර අමාත්‍යවරයා එහිදී පෙන්වා දුන්නේය.
ඒ අනුව පවතින මාර්ග සඳහා සුදුසු පාපැදි මංතීරු සලකුණු කිරීම සහ පදිකයින් සඳහා වන දැනට පවතින ඇවිදීමේ මංතීරු වැඩිදියුණු කිරිම, අනාගතයේදී ඉදිකරනු ලබන මාර්ග සඳහා පාපැදි සහ ඇවිදින මංතීරු ඇතුළත් කිරීමට පියවර ගැනීම, රජයේ කාර්යාල කාර්යමණ්ඩල සඳහා පාපැදි භාවිතය දිරි ගැන්වීමට අවශ්‍ය ක්‍රියාමාර්ග ගැනීම,
කාර්යාලවල පාපැදි භාවිත කරන්නන් සඳහා ඒවා නවතා තැබීමේ ස්ථාන සහ ඒ සඳහා ප්‍රවේශය ඇතුළු අවශ්‍ය පහසුකම් සපයා දීමට මෙහිදී කැබිනට් අනුමැතිය හිමිව ඇත.