ටිබෙටයේ අධ්‍යාත්මික නායක දලයි ලාමා තුමාගේ 88 වැනි උපන්දිනය ලොව පුරා සැමරීමට එක්වෙමින් කැලණිය විශ්වවිද්‍යාලයේ සමාජ විද්‍යා හා මානවවේදය පිලිබඳ පීඨයද උපන්දින සැමරුමක් සංවිධානය කරන ලදී.
ඉකුත් 06 වැනිදා දලයි ලාමා තුමාගේ උපන්දිනය යෙදී තිබුණි. ඒ වෙනුවෙන් මෙම උත්සවය ඉකුත් 08 වැනිදා පැවැත්විණි. විශ්ව විද්‍යාලයේ පාලි හා බෞද්ධ අධ්‍යයන අංශය, බෞද්ධ සහෝදරත්ව පදනම, ඉතිහාසය සහ සංස්කෘතික දෙපාර්තමේන්තුව හා පෙරදිග අධ්‍යයන අංශය සහ ජාත්‍යන්තර බෞද්ධ මධ්‍යස්ථානය එක්ව මෙය සංවිධානය කරනු ලැබීය. මෙහි ප්‍රධාන දේශනය ටිබෙටයේ මධ්‍යම විශ්ව විද්‍යාලයේ හිටපු උප කුලපති මහාචාර්ය ගේෂි නගාවන්ග් සම්තෙන් මහතා විසින් පවත්වනු ලැබීය.
ටිබෙට් ජනතාවගේ ආධ්‍යාත්මික සහ ආගමික නායකයා වන දලයි ලාමා තුමා සතිපට්ඨාන සුත්‍රය සහිත සගරාවක් ලොව පුරා ප්‍රචලිත කිරීමට සමත් විය. එතුමා ග්‍රන්ථ සියයකට අධික සංඛ්‍යාවක් ලියා ප්‍රකාශයට පත් කර ඇත. බෞද්ධ ධර්මය පිළිබඳ ආචාර්ය උපාධියක් සහිත එතුමා සූත්‍ර, අභිධර්මය, විනය සහ බොහෝ බෞද්ධ වැඩසටහන් ඉදිරිපත් කරමින් බුදු දහම ලොව පුරා ප්‍රචලිත කිරීමට අමිල මෙහෙවරක යෙදී සිටිති.
සාමය වෙනුවෙන් 1989 වසරේ දී නොබෙල් ත්‍යාගය ද එතුමා හිමි කරගෙන තිබේ.